السبت، 6 أكتوبر 2012

الطوفان ..

تقول الاسطورة إنك إذا آمنت بشىء ما او هدف ما , فاعلم أن هدفك سيحارب الدنيا كلها حتى يصل إليك فى مكانك
فقط كل ما عليك هو الإيمان بقوة فيه
                                               .................................................................

انطلق سيارة ثلاثتنا  تشق طريقها وسط الماشية وبنى البشر متجهة نحو هدفها فى تلك المنطقة الريفية الواقعة على اطراف الجيزة
كُنا فى دنيا غير الدنيا .. دنيا أخرى من الانفصال عن ما حولنا ولما لا  !!
لما لا وكاسيت  سيارتنا يصدح بأحد اروع اغانينا ,  التى تفعل بنا ما تفعله الخمر بالسكارى . زجاج السيارة مغلق بالكامل . غير مسموح بسماع اى صوت خلاف الخارج من  كاسيت السيارة . لم نلاحظ ان الوجوه حولنا مذعورة ., الناس تهرول نحو شىء ما او الاصح نحو اللاشىء .. لم يشغل بالنا ما يحدث فى الخارج , ولم يلفت نظرنا ان الموت حاضر بقوة على كل وجه تقع عليه اعيننا .. مازال كل كوبليه من الأغنية .. لا ليست أغنية .... بل قل أروع مرثياتنا  يسلمنا إلى الكوبليه الذى يليه .  ومستمرون نحن فى نشوتنا وإنعزالنا عن محيط الموت من حولنا .حيث كل شىء ينطق بالفناء .. ذعر البشر , اصوات الحيوانات , الهروب والهروب والهروب هو عنوان ما يحدث بالخارج .
ومازلنا نحن فى غيبتنا ... وسُــكرتنا .. ونشوتنا . الأغنية مثلها كمثل أى شىء .. يولد ويزدهر ويذبل وينذوى

و الأغنية التى اسكرتنا وصلت لمرحلة إزدهارها  ...  النيرفانا  ...
  بلغت الأغنية اورجازمها ... وهتفنا معها

كورجا سوك جاام
سد نوليه
طوب طوبة نسوكـا
أمن تــارونيه
طوفان نسوكـا
بهر نوليه
جيزا لوج فللااان

كوكــى تانوني
سمرا .. نوبة تو..........


وفجأة حل الصمت وراينا الجبل فوقنا .. جبل من المياه المندفعة التى تجرف ما حولها بقوة وعنف وتقتلع الاشجار والنخيل وتقذف بالبشر يميناً ويساراً , السيارات كأنها قطع نرد فى يد لاعب الطاولة , البيوت تتحول لبيوت من الرمال بناها طفل على شاطىء البحر
لم يمر وقت كثير حتى صرنا تحت رحمة الطوفان انخلعت ابواب السيارة بفعل الاصطدام العنيف بأحد الاسوار واستطعنا الخروج لنحاول النجاة .. واستعادنا فوراً دروس السباحة من الذاكرة ولكن الأمر لم يكن بتلك البساطة ..
حل الموت بحذائه الثقيل على نفوسنا وانتهينا من إقناع انفسنا بتلافى كل فرص النجاة ... واقتنعنا أن لا عاصم اليوم واستسلمنا لمصيرنا المحتوم فى انتظار إعلان نهاية رحلتنا مع الحياة . انفكت ايدينا عن بعضها بعد أن حاولنا التشبث ببعض فى ظن منا أن النجاة ممكنة . تلاقت نظراتنا سريعاً كأننا نودع بعضنا الوداع الأخير ... اصابتنا الدهشة .. لما وجدنا ذلك المشهد .
لم ترتسم على ملامحنا علامات الرعب أو الوجل .. بالعكس ثمة ابتسامة هادئة وراضية مرسومة على شفاهنا  فى مشهد استثنائى ويخالف تماماً كل ما حولنا حيث خرجت ارواح الناس وتركت وجوهم باخر إنطباعات رُسمت عليها وكلها لم تخرج عن الرعب والفزع واللوعة  والوجل الشديد ..
من اين اتى الرضا والهدوء هذا وسط هذا الطوفان الهادر .. اغمضت عينى فاقتحمت مخيلتى فجأة صورة جدى الذى لم اراه ابداً حيث لم يواكب هذا الأختراع المسمى بالكاميرا ..
رأيته .. ولمحت وجهه يحمل  نفس الابتسامة .

مصطفى الشوربجى
القاهرة فى 1/2013

الاثنين، 1 أكتوبر 2012

مسلم , مسيحى , يهودى , بهائى , بوذى , شيعى , در..




هدأت قليلاً او قُل هدأت تماماً وتيرة الاحتجاجات والمظاهرات التى اندلعت للرد على الفيلم المسىء أياه فى حق خير الآنام سيدنا محمد عليه افضل الصلاة والسلام ...  والذى لن تنال منه ترهات البشر اي ما كانت
قام الكثير منا باداء فريضة الدفاع عن رسول الله بتغيير صورة البروفايل او الكافرفوتو إلى صورة تحمل كلمة " إلا رسول الله "
وانطلقت دعوات خطباء المساجد بالحث على اتباع سنة النبى الكريم كافضل سبل الرد على الاساءة اياها .
طبعا سنتجاوز تماما الحديث عما حدث عند السفارة الامريكية ...
واستقر الأمر عند اغلب المعتدلين على ضرورة اصدار قانون دولى يحرم الاساءة للرسل والمعتقدات ويجرم فعل ازدراء الاديان الخ
وهو فعلاً امر محمود .. فالعقائد الدينية وصورة الاله عند البشر لها من القدسية ما يستوجب حمايتها من الازدراء او التشويه
ولكن ... اخى المسلم عندما تنادى بهذا القانون تذكر هذه التعليمات البسيطة

1 - انسى يا بوب انك تقرب جنب عقيدة الأقباط بأى إهانة من اى نوع .. حاول كده تفهم ان ربنا لما أنزل فى كتابه الكريم ايات خاصة بالعقيدة المسيحية  كان بيقولك عشان تعرف مش عشان تروح تعايرهم وتسب فيهم براحتك  وتقولهم يلا يا كافرين ياللى بتقولوا الله ثلاثة أو تفكر مثلا انك تحرق الانجيل كتابهم المقدس
لأن ببساطة دى عقديتهم اللى هما ارتضوها لنفسهم .. فا مش هينفع تسىء إليها طالما مش هتقبل حد يسيء لعقيدتك
هتعرف تتعامل انتا ان كل واحد يقول اللى هو عاوزه وتتكيف مع الموضوع ده ... قشطة اتكلم براحتك
مش هتقبل وهتروح تدمر وتكسر وتحرق .. من الافضل انك ما تتكلمش على عقائد غيرك

2 - للاسف يانجم .. اليهودية هتبقى خط احمر .. وهتحرم من الدعا على اليهود واليهودية  كل صلاة جمعة .. لأنك اكيد مش هتقبل ان حد يدعى عليك وعلى اهلك انهم يتيتموا او ان نساء اهل بيتك يترملوا او ان امهات قرايبك ينضموا لقائمة الثكالى .
إلا لو هتدعى على الصهاينة
 انما اللهم عليك باليهود فى المطلق كده هيبقى تحريض ضد اهل ديانة سماوية بشكل عام وطبعا هتأخد بالك وانتا بتتكلم على يوم السبت وعلى حائط المبكى .... وعلى شكل الطاقية اليهودية وكل ما يمت للرموز الدينية اليهودية بشكل عام .... حتى لو هى من وجهة نظرك عقيدة محرفة وعقيدة فاسدة

3- خد بالك بقى انك مش هتبقى موضوعى خالص انك تطالب بعدم ازدراء الاديان وانتا اصلاً مش معترف بالبهائية مثلاً .. وبتجبر اى بهائى انه يكتب امام خانة الديانة فى بطاقته اى حاجة غير كلمة بهائى وانه لو انجب ولد مش هيقدر يستخرج له شهادة ميلاد او يدخله مدرسة .. .. وافتكر ان البهائى فى مصر اللى رفض ان يكتب شرطة امام خانة الديانة واصر على كلمة بهائى .. مش بيقدر يستخرج بطاقة رقم قومى او انه يسافر او انه يشتغل او انه يفتح حساب فى بنك وحاجات تانية كتير
واوعى دعاة من الدعاة المسلمين الافاضل يتريق على بهاء الله او كتابه او اتباعه او اى حاجة من الحاجات دى ...
هتقولى ان البهائية دين مش سماوى ..
هقولك للاسف بقى لو هتفكر بالشكل ده فأنا مضطر اقولك ان مفيش حد فى الدنيا بيعترف ان الاسلام ديانة سماوية ...
وسبحان الله يا مؤمن الوحيدين اللى معترفين ان الاسلام ديانة سماوية هما البهائيين اللى انتا مطلع دينهم دول

4 - مش كده وبس ...
فى ناس فى جنوب شرق اسيا بيتبعوا ديانة اسمها البوذية .. وبيعتقدوا ان بوذا هو الاله وبيقدسوه وبيصنعوا له تماثيل ضخمة وكده
دول برضه حاسب عشان مش هتقدر تفتح بقك معاهم ولا تقولوهم تلت التلاتة كام .

5 - اخر حاجة بقى ...
مش هتعرف تتكلم عن الشيعة نص كلمة ... :)

هل لسه عاوز قانون لمنع ازدراء الاديان او المعتقدات او اهانة الرسل او الرموز المقدسة ؟؟؟
انا شخصياً مع قانون زى ده .... يمنع اى ازدراء  او اهانة لأى معتقد او ديانة او فكر او رمز دينى لجماعة من الناس