عرض لـ كتاب الأخوان المسلمون وسنوات ما قبل الثورة

أنتهيت من قراءة كتاب الإخوان المسلمون وسنوات ما قبل الثورة .. فى صراعنا الحالى مع تلك الجماعة المغتصبة الخارجة عن اى توافق او عهد والتى لا ترى سوى اهدافها وتطلعاتها فقط بغض النظر عن اهداف الوطن او آلامه . لابد و أن ننفصل جزئياً عن الصراع اليومى ونحاول قراءة الجماعة من الداخل ونعرف تشريحها ونلمس توجهاتها وخلفياتها والمسكوت عنه فى داخل هذا التنظيم الهرمى المعقد ..
وكتاب الإخوان المسلمون وسنوات ما قبل الثورة يتناول تلك الفكرة .. الغوص فى أعماق الجماعة بعقل وقلم باحث جدير ومحترم فقدناه للاسف منذ عام ولم يشعر به احد فى غمرة الاحداث اليومية التى نمر بها .

نبذة عن المؤلف حسام تمام ( 1972 - 2011 )
من ابرز الخبراء العرب فى شئون الاسلام السياسى ومؤسس أول مرصد متخصص فى دراسة الحركات الاسلامية , عمل محاضراً فى جامعة زيورخ وساهم فى العديد من الاصدارات المتخصصة فى الشرق الاوسط بالتعاون مع عدد من الجهات البحثية الأوربية .

يتناول الكاتب عدة أطروحات مثل تراجع الجماعة عن تراثها المدنى والحضارى او بالاصح موجة الترييف التى حدثت فى الجماعة
وتأكل الأطروحة الأخوانية لمصحلة التيار السلفى المتشدد بما يسميه الكاتب موجة تسلف الجماعة ثم يستعرض مواقف الجماعة ازاء قضايا مثل الجهاد  

1 - الجماعة وفكرتها ..

يبدأ الكاتب فى تشريح فكرة الجماعة ويسهب فى الحديث عن هيكلها والفكرة التى قامت عليها ثم يوصف التيارات المختلفة داخل الجماعة وكيف يراها الفرد الأخوانى وماذا تمثل له .. فيقول
"  بإستثناء الأطروحة المركزية عن الإسلام الشامل , فثمة تعددية فكرية فيها داخل الجماعة التى تضم تيارات تبدأ من السلفية وتنتهى بالليبرالية المتدينة . لا تميل للحسم فى القضايا الفكرية إلا مضطرة .. لكى تظل الممثل الأول لفكرة الاسلام الشامل . هى إطار سياسى اكبر من حزب واصغر من دولة , خلقت مجتمعاً موازياً له شبكة علاقات ضخمة ... شكلت فضاء إجتماعياً موزاياً كبيراً يعيش فيه المرء من الميلاد للممات .. فـنجد " الأخ " ينتظم فى اسرة تجمعه بأقرانه وتربطه بصلات تنظيمية وإجتماعية , تملأ حياته بحيث لا يستطيع ان يفلت منها أو يفكر فى الافلات , فهو يعيش ويتعلم ويصادق ويتزوج ويجد فرصة عمل وينشط سياسياً ودعوياً فى فضاء إخوانى كامل ولا يتبقى لهم سوى إطلالة على المجتمع من ثقب التنظيم ولا يخرج الفرد من هذا المجتمع المغلق إلا بقطيعة وصدام عنيف .. فمن يختار الإنفصال فهو يرفض بالأساس مجتمع نشأ وتربى به " 
ويكمل ايضاً .. 
"  يعد الانضمام للأخوان احد آليات الصعود الأجتماعى فى الطبقات الدنيا .. إذ تتيح الجماعة لأعضاءها فرصة التحقق من خلال شبكة إجتماعية كبيرة وتساعد هذه الشبكة فى تأمين الحد الادنى من الضمان الاجتماعى لأعضاءها " 


2  -  ترييف الجماعة 

وينتقل الكاتب بعد ذلك لفكرة الترييف التى طرأت على الجماعة بعد التاسيس الثانى لها فى أوائل السبعينيات بعد حالة الأنحسار التى حدثت لها فى المدن والحضر .. 
"  اخذت فكرة التنظيم فى الضعف و التراجع فى اوساط الشباب فى المدن خاصة ان الجماعة شهدت فى العقدين الأخيرين زيادة مفرطة فى مساحة التنظيم والعسكرة على حساب الدعوة المفتوحة القادرة على استيعاب كل المقتنعين بالفكرة .  و لعب الريف دوراً بارزاً فى مد الحركة الأخوانية بمخزون اجتماعى , وغالباً يظل هؤلاء أقرب إلى التكوين الريفى فى ثقافتهم و رؤيتهم للعمل العام فالتكوين العلمى والعمل الجامعى يظل لديهم أقرب لوظيفة او منصب . وكثير منهم بالفعل متميز فى الجانب العلمى غير انه منفصل تماماً عن العالم فى تكوينه الثقافى .. لدى جماعة الأخوان نحو ثلاثة آلاف عضو فى هيئات التدريس بالجامعات ولكن معظمهم من دون وعى نقدى وهم فى ذلك جزء من المناخ العام فى مصر  , شهدت السنوات الأخيرة سيادة ثقافة ريفية تخالف ما نشأت عليه الجماعة الحضرية .. ثقافة تتوسل بالقيم الأبوية حيث الطاعة المطلقة والإذعان للمسئول التنظيمى و انتشار سلوكيات مثل تقبيل الايدى والروؤس .

3 - تسلف الجماعة .. 
حدث تحول فقهى وسلوكى شديد الوضوح فى عقل الجمعى للجماعة وصعود بالغ للتيار السلفى على حساب فكرة الاسلام الوسطى التى ميزت الجماعة  ويوضح  تمام هذا الصعود .. 
"  ظهرت مسائل فقهية معتادة فى الفكر السلفى الوهابى مثل العلاقة بين الرجل والمرأة والموقف من الموسيقى والفنون بشكل عام وظهرت النقاشات والخلافات بين شباب الجماعات و بين بعض شيوخ الازهر وصلت لدرجة اتهامهم بالممالأة وتغلبت روح التشدد فى مواجهة الروح السائدة .. " 
 كما انتشر الحديث لأول مرة عن زى المرأة واخذت مسألة الحجاب تأخذ وزناً مختلفاًً داخل اورقة الجماعة ونظرة لقسم الاخوات فى الجماعة فى بدايات إنشاءها ونظرة أخرى للقسم حالياً تبين بجلاء كيف اختلف زى النساء وشكل الحجاب داخل الجماعة وكيف اثرت الافكار السلفية وانتشرت بشدة داخل هذا التنظيم الذى طالما اكد على وسطيته .. 
وكانت الأجيال التى دخلت الجماعة فى السبعينيات والتى خرجت من رحم الجماعة الاسلامية فى الجامعات دورها الكبير فى تغيير شكل الجماعة وافسح الطريق لأنتشار المد السلفى داخل التنظيم بشدة .. ويذكر فى هذا الصدد عبد المنعم ابو الفتوح فى كتابه
" شاهد على تاريخ الحركة الاسلامية " ان شباب الجماعة الاسلامية كانوا يأخذون على شيوخ الأخوان تهاونهم فى مسائل اللحية والجلباب ولشدة التطرف الذى كان مسيطراً على شباب الجماعة الاسلامية وقتها اضطر شيوخ الأخوان لمجاراتهم بعض الشىء كى يكتسبوا ثقتهم ويستطيعوا إقناعهم بدخول جماعة الأخوان .
ويفسر تمام ذلك التوجه السلفى الجديد بأمر له مدلول شديد الأهمية .. فيقول 
"  كان الدعم الذى تقدمه الهيئات الدينية السعودية الرسمية والغير رسمية للأسلاميين احد قنوات العلاقة السعودية الاخوانية وتمثل ذلك فى الرحلات الجماعية الميسرة للحج والعمرة التى كانت تعود وخلفها ارطال من الكتب الدينية والوهابية التى تحمل شعار يهدى ولا يباع " 

كما يبين اثر ذلك التوجه على فقه الإخوان وخطابهم .. 
"  فى مشروع الأخوان لدستور إسلامى عام 1953 كان من السهل حسم مسألة المواطنة لتصبح بعد اكثر من نصف قرن من التطورات المتلاحقة من اكثر القضايا التى حدثت فيها تراجعاً فى مشروعهم لعام 2007 ." 


3 - فكرة الجهاد عند الأخوان ..  يقول تمام 

الجهاد فكرة مركزية فى منهج الاسلام السياسى , بحيث لا يمكن تجاوزها بمبدأ المراجعة الفكرية . ولكن معركة الجهاد لدى الأخوان تبدو رهناً بدرجة الحضور أو الابتعاد عن السياسة . لا يرفض الاخوان فكرة الجهاد المسلح فى مواجهة المحتل او الدولة الغير اسلامية ولكنهم لا يتورطوا بأنفسهم فى اى مواجهات ويفضلوا ان ينوب عنهم الاخرون 
وقرر الاخوان ان الاولوية لبناء التنظيم مع الاستفادة الدعائية من الجهاد. 
وفيما يلى عدة أمثلة من عدة دول يوضح كيف تفاعل الأخوان مع فكرة الجهاد 

فى مصر .. 
بعد إغتيال السادات على يد تنظيم الجهاد والجماعة الاسلامية سارع الاخوان بتحديد موقفهم ودشن الاخوان حضورهم الجديد على اساس انه تيار الاعتدال وكان قرارهم بالتحالف مع حزب الوفد الليبرالى فى انتخابات 84 , وصارت الجماعة تتورط بالتدريج فى منظومة يصعب ان تنتج عنفاً حتى لو حمل من يدخلها جينات كامنة لهذا العنف تاسيساً على كتب وادبيات تجاوزتها الجماعة ولم تملك جرأة نقدها ومراجعتها .

فى الجزائر 
التحقت الجماعة بالسلطة فى مواجهة مشروع جبهة الانقاذ الاسلامى وقبلت اللعب دور الاسناد الاسلامى للعسكر فى حملتهم ضد التمرد الاسلامى وقبل محفوظ نحناح زعيم جماعة الاخوان فى الجزائر المشاركة فى الانتخابات الرئاسية الصورية .

فى العراق 
لم يتردد الاخوان فى الألتحاق بالعملية السياسية تحت قيادة الحكم الانتقالى برعاية بول بريمر مندوب الاحتلال وفضلوا مقاومة الاحتلال بالعودة إلى التوبة كما سجلت لوحات إعلانية إمتلات بها مساجد العراق ( قاوموا الاحتلال بالتوبة فى رمضان )

فى سوريا .. اختلفت القصة 
كان أخوان سوريا الاستثناء .. حيث تمردوا عسكرياً على السلطة ونظام الاسد وانتهت المواجهات بمجزرة عكسرية فى حماة راح ضحيتها الألاف .
انتهى عرض الكتاب وبقى تعليق
الكتاب بالفعل رائع جداً ويختلف كثيراً عن فكرة عضو الاخوان المنشق الذى يصدر كتاباً يقطع فيه اوصال الجماعة وتفوح من كتابته رائحة الانتقام ويشوب حديثه كثير من عدم الموضوعية
اما هذا الكتاب فيعرض بشكل علمى وموثق بشدة التطورات والتحولات التى طرأت على جماعة الاخوان بعد تأسيسها الثانى


مصطفى شوربجى
10/3/2013

حــزب نــوبــى ... كــيــــــف ؟؟

فى صيف عام 2012  سعدت بشدة  أن جمعتنى مصادفة عزيزة مع الأستاذ فوزى جاير...
 وكانت لتسجيل فيلم وثائقى نوبى وكان هو حينها المتحدث الرئيسى فى هذا الفيلم الذى للاسف لم نستطع عرضه حتى الان لأسباب يطول شرحها .
 و عرفت حينها ان فوزى جاير تربطنى به زمالة حزبية حيث اكتشفنا يومها أننا سوياً ضمن الوكلاء المؤسسون لحزب الدستور والطريف ان كل منا كان يحمل عدد جريدة الشروق الذى حمل اسمائنا كوكلاء عن هذا الحزب وكان هو عن محافظة اسوان وانا عن محافظة الجيزة .
وأخيراً تلقيت منه مشكوراً دعوة عبر موقع الفيس بوك للأشتراك فى صفحة أسمها الحزب النوبى ..
و تلك الدعوة هى اساس لما ستقرأه لاحقاً ..


أعود لبداية تشكل وعيى السياسى ..  لفترة  تسبق الثورة بسنوات قليلة فأجد نفسى لأ اؤيد فكرة الحزب القائم على العرقية  , ولا أظنى اؤيدها حتى الأن .. لأسباب عديدة أهمها إقتناعى بمبداً رفض التمييز وكنت أقول كيف بمن احترق بنار التمييز أن يلجأ لمثل تلك الحلول  ... الحزب النوبى
فالمفترض ان الدولة والاحزاب والجامعات والمدارس والنوادى والهيئات وكل المؤسسات  عامة كانت او خاصة مفترض انه مجرّم التمييز فيها على أى أساس اللون او الجنس او العرق او العقيدة او او او
وبالتالى فالحزب النوبى مرفوض لأنه ميّز ضد كل ما هو غير نوبى والمبادىء لا تتجزأ تبعاً للهوى او مفترض أن يتم ذلك


ولكن ولأننا بشر .. ولأننا نبغى الكمال ولا نروده ...  وبالرغم من كل تلك القناعات ..
إلا أن الدعوة و صاحبها والنوبة .. أجبرتنى على الوقوف للتفكير مرة أخرى .فالنوبة عندما تأتى بجوار أى كلمة أخرى فهى تغيرها من النقيض للنقيض .
بمعنى اننى اكره التعصب .. ولكن لو ذكرت كلمة التعصب النوبى قد افكر فى امرى
واننى اكره الكشرى مثلاُ .. ولكن فى حالة وجود كشرى نوبى .. فقد يصبح افضل أكلاتى
واننى اكره العادات والتقاليد بشكل عام .. فقط اضف كلمة النوبية للجملة وتجدنى اشدهم حرصاً عليها

وبالتالى .. دفعتنى الدعوة للتفكير مرة أخرى لربما أجد مخرجاً لا يتصادم بشدة مع معتقداتى ..
وسأعرض فى 3 نقاط محددة ومبسطة رؤيتى للفكرة بشكل مبدئى ..

- الأسم ..
الاسم عامل كبير لنجاح اى فكرة جديدة .. واعتقد اننا بكلمة الحزب النوبى قد ضيقنا ما هو واسع بمعنى اننا قد وقعنا فى أول أخطاءنا القانونية عندما اطلقنا أسم تمييزى بشدة لهذا الكيان الوليد .. وبهذا نكون قد خالفنا قاعدة عدم التمييز على اساس العرق بشكل خارق وظاهر للكافة
فعلى الرغم من وجود نص يمنع قيام احزاب على اسس دينية فنجد انه لدينا احزاب الحرية والعدالة والنور والبناء والتنمية والوسط والأصالة ومصر القوية ولكنك لا تجد فيهم كلمة اسلامى رغم وضوح توجهاتها الاسلامية  بشدة . ولكن تماشياً مع القانون الذى يمنع قيام أحزاب على اسس تميزية تجد أن أسماء تلك الأحزاب عمومية تماماً وهذا ما يجعلنا نعيد التفكير فى الأسم مرة اخرى .. وليكن على سبيل المثال حزب مصر الافريقية  واقول على سبيل المثال لتوضيح الفكرة ليس أكثر .

- الخط العام للحزب ..
اعود مرة اخرى لحزب مصر الأفريقية وانا متعصب للفكرة لا للأسم فى حد ذاته .. فكرة مصر الافريقية .. فهذا الحزب الوليد يجب ان يؤسس لفكر مبتكر , شامل , جديد
يجب أن يضع استراتيجية فريدة غير مسبوقة فكراً او تنفيذاً
فيضم فى صفوفه كل مصرى يرى مصر فى ثوبها الافريقى وليس فى ثوب اخر كل من يولّى  وجهه شطر الجنوب , كل من اعطى ظهره للشمال والشرق والغرب
كل من يرى مصر  سوداء ..

 كل من يؤمن مثلا انه لايد أن ياتى يوم ومصر والسودان عادا كيان واحد ودولة واحدة تعتبر عروس وادى النيل , كل من يؤمن ان افريقية مصر هى الاصل وان النوبة هى الإثبات والدليل الشرعى الوحيد ان مصر افريقية .
هو حزب لكل المصريين المؤمنين بتلك المبادىء وانه لا تقدم ولا تطوير ولا حداثة ولا مستقبل بغير ان يعاد تعريف هذا الوطن طبقاً لجغرافيته وموقعه التاريخى , بغير ان ينفض عن جسده كل الغبار  وعن وجهه كل تلك التشوهات التى عبثت فى عصب وجوده و استهانت بقيمه وعاداته وتراثه  ,  حزب يتبنى إعادة  تعريف هوية الوطن  وشكلها ورائحتها وكينونتها


- الإتجاه السياسى والإقتصادى للحزب ..
حزب بدون برنامج سياسى وإقتصادى واضح ومحدد هو ليس حزب بل فى حقيقة الأمر هم أناس يملكوا من النوايا الطيبة الكثير ولكنهم اقرب للهزل منهم للجد وقتئذ .
فإمتلاك رؤية سياسية للحزب وضع برنامج إقتصادى هى بديهيات أى عمل حزبى
ولن اضع العقدة فى المنشار كما يقولوا واسال أسئلة تعجيزية من نوعية ماهو البرنامج  الإقتصادى للحزب الوليد .

 لانه وبصراحة شديدة أغلب الأحزاب القائمة لا تملك برنامج اقتصادى واضح ومحدد

ولكن يمكننا الأستعاضة عن ذلك بتبنى رؤية إقتصادية معينة كمثل الديمقراطية الإجتماعية على سبيل المثال فهى منهج سياسى واقتصادى وسطى ويسمى عالمياُ الطريق الثالث ويمثل البديل الأنجح بعد إنهيار فكرة الايدولوجيا فى كل العالم وهذا ما يفسر سقوط كل الاحزاب الراديكالية فى العالم الشيوعى منها والقومى واليمينى المتطرف مع الوضع فى الاعتبار شواذ القاعدة .
كما أننا نمتلك أمثلة ناجحة قدمت اروع النماذج لهذا المنهج الفكرى كالدول الأسكندنافية او ما يسمى فى الأدبيات السياسية بدولة الرفاه التى يقوم اساسها على فكرة إلتزام الدولة بتقديم خدمات معينة لا يجب ولا يصح ان ينفرد بتقديمها القطاع الخاص وتقدم الدولة هذه الخدمات على ارقى ما يكون وفى المقابل يتم فرض ضرائب مرتفعة على المواطنين تصل فى بعض الاحيان لــ 60 % فى دولة مثل الدانمارك .


ما طرح هو مجرد فتح لباب المناقشة فى سبل تهميد طريق لنجاح الفكرة  ... ولكن الموضوع من التعقيد ما يلزمه مقالات ومقالات ومقالات .... وإلى هنا كان ذلك ما خطر على بالى عندما وصلتى دعوة الأخ العزيز فوزى جاير .. مع تمنياتى للقائمين على هذه الفكرة الجهادية كل السداد  والتوفيق


مصطفى شوربجى
16/2/2013

من المعادى للتحرير ... قصة ميكروباص

- تحرير يا أسطى ..
- تحرير .. يا لورد .. اركب هنا جنبى
انا بكره مترو الأنفاق .. بحس انه مواصلة قمة فى النمطية والملل , مش بس كده .. فى مشكلة كمان اكبر من النمطية
كفاية  ان الناس  مقتحمة  خصوصيتك لما تلاقى نفسك محاط بالناس من جميع الاتجاهات . شخصياً بعتبر ان الدائرة الوهمية اللى قطرها متر وانا مركزها  بعتبرها حدودى وخطوطى الحمرا .. اى تعدى عليها فعلاً بحس انه اعتداء على خصوصيتى واقتحام لنفسى
فكرة انى اضطر اقف جنب حد بالشكل ده والمسافة القريبة اوى دى .. مزعجة جداً
عينك فى عين اللى جنبك مفيش سنتيمرات بينكم .. تدور برأسك يمين او شمال تلاقى روؤس لاصقة فيك وانفاس متداخلة وحاجة كده اخر قرف بجد ..
شخصياً بعتبر الميكروباص او اتوبيس هئية النقل العام الأحمر الجديد ( لو فاضى ) مواصلات مناسبة لحد ما وادمية بشكل معقول
على الاقل الناس بتبقى قاعدين وشوشهم للأمام كلهم وكل واحد سارح فى دنيته .. مش عينه سارحة فى شكل لبسك ومنظر شعرك
ركبت جنب سواق الميكروباص الشاب اللى لابس ترينينج سوت نايكى ومصفف شعره بشكل انيق ولغته مع الناس محترمة جداً
عينى من ساعة لما ركبت من كورنيش المعادى عند المدخل الأول منزلتش من على منظر نيل المعادى ..
لغاية ما وصلنا عند مستشفى المعادى ,, هتقولى عرفت منين انك وصلت لمستشفى المعادى وانتا عينك على الكورنيش ..
هقولك من مهبط الطائرات الهليوكوبتر اللى قصاد المستشفى واللى تم إستخدامه لمرة واحدة فقط  لنقل جثمان  الرئيس السادات  لمستشفى القوات المسلحة فى المعادى بعد  ما أتضرب  بالنار فى حادث المنصة .
عقلك هيكون مشغول بفكرة إغتيال الرئيس وخلفيات الحادثة لغاية ما تشوف على يمينك حروف كبيرة بارزة على واجهة عمارة فخمة جداً .... ابـــــو الـــفـــــتــــــوح ..
فتنسى السادات وتفتكر حسن ابو الفتوح اللى كان من القطط السمان فى عهد السبعينيات واللى اُثروا بشكل بشع من  قرارات الأنفتاح فى عهد السادات ..
كفاية بس تعرف ان السادات صنع فى يوم واحد 28 مليونير تقريباً لما وزع توكيلات الشركات الكبرى على بعض رجال الأعمال المرضى عنهم . وكان توكيل بى ام دبليو من نصيب حسن ابو الفتوح .. رجل الأعمال الزملكاوى الشهير اللى اتولى فى يوم من الأيام رئاسة نادى الزمالك .. واللى يقال إنه وعد فاروق جعفر ملك النص فى زمالك السبعينيات  بسيارة بى ام دبليو اخر موديل لو قدر يقنع  زملاؤه فى الفريق انهم يتهاونوا فى  ماتش كوتوكو الشهير  نكاية فى مجلس الإدارة وقتها وفعلاً حدثت  ما تسمى بفضحية كوماسى وهُـزم الزمالك 5 / 2 وتمت إقالة مجلس الأدارة واتى حسن ابو الفتوح على راس المجلس الجديد ..
ايييييييييييييييه كل ده ... ايه اللى جاب حسن الفتوح والزمالك للى انا بحكى فيه ده
ببساطة هو ده الميكروباص ...
طول ما انتا ماشى دماغك بتشتغل مجرد ما تشوف اسم شارع او يافطة شركة او بيت شخص
مش تقولى مترو الأنفاق ... يا راااااااااااجل يغور بريحته

فى محطة فم الخليج وعند اول شارع قصر العينى .. لمحته واقف , هيئة مرتبكة لحد ما , جسم سمين بس بتماسك وغلظة , وجه مستدير فى سن السبعين تقريباً وتبدو عليه مظاهر القوة والصحة .. عيون واسعة , حواجب كثيفة جداً يكسوها الشيب بقسوة , راس أصلع إلا من قليل من الشعر من خلف ومن الجوانب .. وجهه ضخم ولكن يوحى بالطيبة الشديدة .. يحمل شنطة سفر متوسطة الحجم
ما أن اقتربت العربة منه .. حتى اخد يلوح فى إضطراب .. تحرير ... تحرير ..
ايوة يا حج .. قلتها وفتحت الباب واتخذت مكانى فى الكرسى بينه وبين السائق ..


ناولنى الشنطة قائلاً : ..  ثوانى بس وهاخدها منك تانى لما اركب ..
- على مهلك يا حج هات الشنظة ..
مد يده وامسك باليد أعلى الباب وبذل جهد عظيماً فى رفع جسده من على الارض حتى كرسى الميكروباص .. واستقر أخيراً وتناول شنطته .

وبدأنا ..
- معهد السكر ده ناس محترمين جداً , ربنا يبارك لهم ... مرة روحت هناك كان عندى ازمة .. ماشاء الله عليهم اهتمام ايه ورعاية ايه
قعدت يومين وخرجت زى الفل ... ولغاية دلوقتى الحمد لله ماحصلتليش تانى .. ربنا يشفى كل مريض
- انا : الحمد لله .. ربنا يديك الصحة  .. رديت بأقتضاب وسكتت ..
من طباعى عدم تبادل الحديث مع غرباء

- الشنطة مضايقاك ؟؟؟ 

- لا يا حاج براحتك ... اقعد براحتك خالص

- معلش يا اسطى مش هاعرف اطلع لك الفلوس .. انا معاك لغاية الأخر ما تقلقش اول ما ننزل هدفعلك 

- الأسطى :  ولا يهمك يا حاج ... خلى عنك خالص

- المنطقة دى قديمة جداً على يمينك المنيرة وعلى شمالك جاردن سيتى ... كانت زمان كلها باشوات واكسلانسات دى .. ايام بقى  

قالها ولم ينظر إليه أحد .
بـــدا لنا أنه لا يتوقف عن الحديث , والتواصل معه  والرد عليه لن يكون حلاً مناسباً   .. فى تلك الحالة
 فقد تنزلق لمحادثة طويلة لا تنتهى , فأثرت السلامة وقررت السكوت تماماً ..
يدخل الميكروباص فى شارع جانبى من شوارع جاردن سيتى للهروب من شارع قصر العينى الذى تحول لجراج كبير بفعل الزحام الشديد
نمر امام قصر لأحد باشوات عصر ما قبل 52 ...

- الله ... شوف الجمال .. ياخى سبحان الله العمارات اللى اتبنت دلوقتى وقعت والحاجات دى عدى عليها اكتر من 100 سنة ولسه واقفة زى ماهى .. الناس زمان كان عندها ضمير .. ثم تنهيدة طويلة .

للحظة ,, شعرت بالتعاطف الشديد  معه ... روادنى إحساس انه شخص وحيد لا يجد من يتحدث إليه فيستغل فرصة ركوب اى مواصلة لتبادل الحديث مع من جاوره .. ربما كان أرمل توفيت زوجته وأنشغل اولاده فى حياتهم ويعانى من شعور الوحدة القاتل ..
ولفت نظرى انه حين يبدأ فى التحدث ينظر إلى فى عينى ولا يتكلم فى المطلق مثل كتيرين .. وهذا دليل على رغبته  وإهتمامه بــ خلق حالة ود وتواصل  مع من يتحدث إليه
شعرت بالحرج من نفسى جداً والاستياء فى نفس الوقت .. كيف كنت قاسى هكذا على شخص لا يريد فقط سوى ان يتحدث وان يجد من يسمعه ويرد عليه !!!
... وبدأت ابادله الابتسام ..
ويمر امام الميكروباص المتوقف عن السير بفعل الزحام , طفل يرتدى قميص لبنى اللون وبنطلون كحلى ويتحدث فى هاتفه المحمول ..
وطبعاً لايفوت مثل هذا المشهد على صاحبنا دون تعليق

- الموبايل ده من قيمة كام سنة كده كان الخط بتاعه يجى بتلاتلاف ولا اربعتلاف جنيه... كان بتاع رجال الأعمال بس دلوقتى يا باشمهندس تلاقيه فى ايد العيل فى الحضانة , الحضاااانة !! مش هاقولك المدرسة حتى .. 

- انا : اها . دى حاجة طبيعية دلوقتى يا عمنا
هو فعلاً لا يتوقف عن التعليق عن اى شىء يراه ... كل ما يخطر على باله شىء يتحدث عنه  ولا يتوقف عن الحديث
حتى لو لم يجد مستمع له .. او حتى لم يجد من يرد على كلامه .. هو يتكلم و يستمر فى كلامه مهما حدث .
فى اخر العربة رجل يتكلم بلهجة صعيدية ويبدوا انه يوصف عنوان عبر هاتفه لمتحدث على الطرف الأخر .

- اهو اتفضل يا عم ... عمال يزعق ويقولك ادخل يمين واطلع شمال .. الناس خلاص كلها مش طايقة بعضها .. يلا

- يا سلام لو الجو يمطر شوية عشان العفرة دى ... لو الدنيا مطرت الدنيا هتهدى شوية ده الواحد اتغسل تراب يا اخى

السائق مشاركاً للمرة الأولى : ما الدنيا بتمطر اهى يا حج انتا مش واخد بالك ولا اييييييه

- تهلل فرحاً كأنه طفل صغير : والله ... !!!!   بتمطر .... !!!!
ايوة كده .. اطلع بقى الطاقية بتاعتى .. انا اصلاً والله كنت حاسس , وقلت انها هتمطر وعشان كده قلت لازم اخد الطاقية معايا .. 

تعجبت لموقفه جداً  , فنحن داخل العربة والنوافذ كلها مغلقة ...  لمــاذا الــطــاقـــــــية ؟؟

- انا : طب استنى لما تنزل يا حاج ... هتلبسها جوة العربية ليه ؟ ... ايه لازمتها ؟

- هو بعصبية واضحة : وانا لسه هستنى لما انزل .. !!!
بقولك لازم البس الطاقية دلوقتى  انا كنت حاسس والله انها هتمطر وعشان كده اخدتها قبل ما انزل 

واعتدل فى جلسته وقام بفتح الشنطة واخذ فى البحث بهمة واضحة وسرعة غير مبررة  ..
حتى اخرج ايس كاب من الصوف اسود اللون  وتشعر من طريقة تناوله الحثيث للطاقية الصوفية كأنها شىء عزيز جداً عليه وكأنها قطعة ذهبية ثمينة  واهتم بأن يلبسها بشكل مضبوط  وظل يبحث على العلامة المرسومة عليها حتى يحدد الواجهة من الخلفيه ...
ربما كانت تلك الطاقية، ما حاولت به زوجته العجوز الراحلة أن تدفع عنه بها برد الشتاء، الذي قد يهزم بأقل مجهود جسده السمين الذي أعيا خلاياه السكر، ربما قررت دفع البرد عنه بشرائها من بضعة جنيهات مقتطعة من مصروف البيت، ربما أعطتها له وهي تقول "البسها واوعى تقلعها ف الهوا، اسمع كلامي والبسها علشان تدفي ودانك" وربما مازال في قلبه شئ من طاعة لكلام الراحلة، جعلته يبدو في حالة الإصرار الطفولي الغاضب تلك، ويأبى أن ينزل من الميكروباص لمطر الشتاء وهواءه الطلق إلا وهو مرتديها، وربما.. ربما اشتراها بنفسه ولنفسه بعد بحث بين باعة الأرصفة عليها، فالراحلة قد ماتت قبل أن تشتريها..
وربما و ربما و ربما .....
 وأخيراً وضعها على راسه وظل يوسد راسه من الخلف كثيراً ليضبط وضعها  بشكل اكثر دقة
ثم نظر إلى المرأة على يمينه ..  وتلفت يميناً ويساراً
بـــدا سعيد جداً .. بــــدا سعيداً جداً بصورته وهو يرتدى طاقيته التى أصر على أن يأخذها قبل نزوله من البيت

نص مشترك بين
صفاء سرور
مصطفى الشوربجى
شارع القصر العينى
فى  8/1/2013

أســـوان ... القبلة جهة الجنوب قليلاً

1- كــنــــوزنـــــا .. اجـــدع نــــاس

على طريق مصر اسوان الزراعى . نعبر مزلقان للسكك الحديدية وتعلن لافتة زرقاء عن نهاية الكاجوج أحد قرى الجنوب  وبداية قرية جديدة . تصطف على يسارك بيوت نظيفة متشابهة ذات دور واحد علىالأكثر تحمل كلها اللونين البيج والبنى كإشارة مميزة لبيوت نوبيو التهجير .. و على المدى تلمح  ثلاث سيدات يقفن قبالة أحد المنازل الذى تجلس صاحبته على المصطبة فى دعة ولامبالة تواصل حديثها مع ضيوفها  , المشهد ينم عن زيارة إنتهت توا , ولكن فى عادة فرعونية على الأغلب يستمر التسامر على باب المنزل , الذى انفتحت احدى ضلفتيه على صالة البيت التى ينبعث منها ضوء اللمبة النيون القوى فى ظلمة الليل  كأشفاً عن أثاث مرتب وأنيق  .. الزائرات يبلسن زى موحد عبارة عن ثوب أبيض رقيق ملفوف , يعلن عن نوبيتهن القحّ . والمهتم بالتاريخ النوبى القديم يرى المشهد بشكل أعمق قليلاً , حين تستدعى ذاكرته خلفيات هذا الثوب ويترائى امامه مشهد جحافل ود النجومى وهى تمارس مذابحها فى بلاد النوبة فى نهايات القرن التاسع عشر.
 أمتار قليلة وتتلقفنا لافتات أخرى تعلن عن قرية وراء قرية
ماريا .. مرواو. ..  جرف حسين . ويتوقف الميكروباص لينزل أحد ركابه , وتتاح لنا فرصة متابعة احدى القرى عن قرب  حيث زينات الاضواء بالوانها الزاهية معلنة عن ليلة فرح فى القرية ولا ينتهى المشهد حتى تلمح  صف من سيارات الدفع الرباعى مختلفة الاشكال والأحجام حاملة للوحات مرورية جمركية .. بطعم النفط .


2- الفوزة ...  

على نفس ذات الطريق السريع و عند قرية الفوزة مركز ادفو .. القرية التى يقيم بها بعض نوبيو تهجير عام 33  تتراص بعض المركبات الصينية الصغيرة المنتشرة فى مصر والتى لم تنجو منها اسوان ومراكزها , ترى ذلك الشاب الصعيدى ذو الجلباب الداكن والقامة النحيلة الطويلة ينتظر زبون لا يأتى بسهولة فى ذلك الوقت من المساء ,  فجلس داخل مركبته ينفث دخان سيجارته الملفوفة وينفق  دقائق إنتظاره فى الإستماع للبروفسير السودانى  عبد الكريم الكابلى وهو يشدو بــــ كل الجمال   .. هكذا وبكل بساطة !!!
فعل ما فعله  وهو لايدرى ماذا فعل بك عندما أرتكب فعلته هذه  .. حيث تنصرف داخلك وتضرب أخماساً فى اسداساً  محاولاً
الإجابة عن سيل من الأسئلة المركبة والجدلية من نوعية ..
 ما علاقة المكان بالهوية ؟ حدثنى عن المزاج السمعى فى الجنوب وأختلافه كلياً وجزئياً عنه فى الشمال ؟
أخبرنى أيهما أقرب لهذا الشاب بحسابات الزمان والمكان والوجدان ... وادى مدنى  أم وداى النطرون ؟ .
بالضبط نفس الموقف حرفياً عند موقف النقل الداخلى فى اسوان
عندما تتداعى إلى أذنيك دقات السيرة يتبعها صوت رخيم وقوى " جنا الباباى .. يا جنا الباباى "

وتسأل نفسك حينها لماذا سمعت جنا الباباى ولم أسمع طاير يا هوى ؟؟
وتستدعى ذاكرتك اوجه مقارنة لحظية بين كمال ترباس ومحمد رشدى . وتنتهى أمام حقيقة تترسخ
أن الأوطان والإنتماءات أبداً لا ترسمها خطوط على خريطة صماء .. القصة  أعقد بكثير من خط رسمه مستعمر  .

هناك فى مصر العليا .. يتناسب طردياً الوصف مع الموصوف
 اهل الجنوب رايـــــقـــّـــيـــــن .. وعـــالــيــيـــــن 

بكل ما تحمله ولا تحمله الكلمة من دلائل و صور . المزاح والضحك والسخرية أسلوب حياة لديهم
 أهل اسوان بمراكزها وقراها وعموديتها  , على ألسنتهم كلمة واحدة من 5 حروف ..
كلمة من 5 حروف تسمعها من ادفو شمالاً حتى ابو سمبل السياحى جنوباً .. لفظة سخرية ومزاح على لسان الجميع  
وجــّـــوجـــــــــا ...
يطلقونها تعبيراً عن إعجاب أو تحية أو حتى لمداعبة فتاة ... أولـلا شىء
 يقال أنها وردت أول ما وردت على لسان فوزى مطرب الجنوب فى أحدى وقفاته الموسيقية التى يحفظها شباب الإقليم .. ومن أجلها إنشئت صفحات الفان بيدج لنفس المطرب على الفيس بوك ..  

فوزى ..  الذين يحدثونك عنه وعن وقفاته وعن كى بورده الجديد  و طرق عزفه المبتكرة .. كما يتحدث المسحورون عن ساحرهم وكما يتحدث اهل الصوفية عن شيوخهم وكما يتحدث أهل كرة القدم عن ميسى وكما يتحدث المولوعون بالتكنولوجيا عن جديد الآى فون 5 . اختلفت أو أتفقت معه .. لكنه حالة جنوبية بإمتياز لا تقل عن الجدل الذى صنعه أوكا واورتيجا وما شابهم هنا فى العاصمة
 

3 - كورنيش اسوان ..

 فى اسوان فقط يوجد هذا الإختراع .. تستطيع ركوب آلة الزمن وتنتقل بين السنون 

فبسهولة جداً وبواسطة فلوكة صغيرة وشاب يعرف مسالك ودروب نيل تربى على ضفافه .. أنت فعلياً ركبت آلة الزمن ..
حيث تتهادى بك تلك الفلوكة ذات صباح شتوى دافىء ومشمس وسط نيل اسوان وتمر بك ما بين جزر ووداخل خلجان وفجأة تجد نفسك تبحر فى خور ضيق يطل على ضفتى جزريتينً .
 على اليسار جزيرة تنتمى لعالمنا ولزمننا , يقف عليها فندق ضخم من واجتهه الخلفية . والأخرى جزيرة  تنتمى لزمن سحيق , حيث لا بشر نهائياً . فقط هى عبارة محمية طبيعية يعيش عليها حيوانات مختلفة بلإضافة للأشجار والغابات الكثيفة  . 

اسمها سالوجا . فى سالوجا تجلس فى مواجهة نيل نوبى معطياً ظهرك لأشجار السنط . وللحظة تتخيل  أن يخرج فجأة اخيك الصغير من وسط غابات  النخيل كى يخبرك ان امكم قد انتهت من إعداد طعام الغداء فتعود بصحبة أخيك عبر الحقول ولا تنسى أن تتوقف أمام  شجرة الليمون المقابلة لبيتكم كى تلتقط بعض ثمارها ..
 وفجأة تنتبه ... اننا لسنا فى عام 1850 وانما فى عام  2012 .
واننا نعيش عهد مرسى وليس عهد الخديوى اسماعيل .
وان النوبة إنتقلت لتسكن فى مكان أخر



4 - عاصمة الفن والإبداع والجمال فى النوبة ... فى أبو سمبل فى حوش بيت تنطق كل اركانه برائحة النوبة حيث الحوش الفسيح والشجرة المزروعة فى منتصفه التى ما إن تراها حتى تتشكل فى مخيلتك رائعة أحمد منيب  ( مشتاقين ) التى كتبها الراحل المقيم بفنه محى الدين شريف  
" جوة البيت هنزرع نخلة ......  تطرح خير وتعمل ضلة " 

تتحلق صُحبتنا  حول صينية المونيوم تحمل اكواب نظيفة لامعة تجاورها صينية أخرى تحمل براد شاى ذهبى اللون و عبوة لبن البودرة و سكرية من البللور وطبق يحمل انتاج البيت من الشريك , ويتطوع أحدنا بتلقيم السكر فى الأكواب ثم يشرع فى صب الشاى حثيثاً حتى يكاد يمتلىء الكوب ليقوم بعدها  بإضافة مسحوق اللبن المجفف .. لبدأ  لون الشاى فى التغير  ويصبح اقرب للون الكهرمان وفى نفس اللحظة تنساب بيننا من التابليت نغمات كى بورد ساحرة يتبعها صوت غازى القوى
 يااا سلام .. سمرا ايدي صباعك لعوردو اير ايدي صباع لعوردو صباع كون صباع كودودتوتا اسمر اللونا .. الهي نورو اسيجا
لحظتها  .. نتوجه كلنا نحو حمادة حداد  
ونكمل فى نفس واحد مع غازى .. ان هداد مغفل ايدي كايوتا واسمر اللونا
" وبعديها علي طول اقفل عين وافتح التانيه واقول يا خوانا احترموني شويه يا خوانا
الوقت الوحيد اللي في حد بيتريق عليا وابقي مستكيف بتريقته " .. حمادة حداد
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

(1) 
مقطع من أغنية أسمر اللونا احد أشهر غزليات العشق النوبيةالترجمة للعربية
سمرا قررت لأول مرة تنزل الأرض وتمسك المنجل وتقص الزرع ..
وهى بتقص جرحت صباعها الصغير
الهى يجازيك يا حداد يا مغفل ياللى خرطت المنجل اللى جرح اسمر اللونا


مصطفى الشوربجى
6 اكتوبر - القاهرة
فى 7/1/2012 

كارت الميمورى يتبوأ مقعده من الجنة

إنتهى من وضع تليفونه على المنضدة ..
موجهاً كاميرته التى تخطت قدرتها الـ 1 ميجابكسل بقليل ... بحيث يظهر المشهد الذى طال إنتظاره وطال التحضير له ...  بشكل أكثر وضوحاً ودقة . كان ينتظرها فى الاسفل وبمجرد نزولها على السلم اخذها سريعاً حيث المنضدة الموضوع عليها هاتفه الصينى الرخيص .
وأدار وجهها نحو الكاميرا التى رأتها أم لم تراها .. لا فرق
طاوعته تماماً  .. لم تبدى أى ممانعة سوى نطقها بعض الكلمات التى تشى برغبتها الحميمة  فى أن يكمل ما بدأه  اكثر كثيراً مما تظهر رفضها لما يفعل .
على طريقة " بوس ...  بس بسرعة يا سى توفيق "
وفعلاً بدأ بتقبيلها ثم سرعان ما أزاح بحركة سريعة من يده الجزء العلوى من ملابسها خارجياً وداخلياً ..
واتنفضت لحظتها ضاحكة وقالت " انتا هتعمل أيه " قالتها أيضاً بطريقة تجعله يواصل مهمته بشكل اسرع وامهر .. وأكثر إحترافية  .
وقبضت يده على نهدّيها . وسرعان ما بدأ يصيبها دوار النشوة وأستسلمت له مكتفية بأن تقول بعض الكلمات الواهنة  التى لا تسمن ولا تغنى من جوع ...
" امى نازلة ورايا " ... " يخرب بيتك يا كارم " وتقريباً كانت أمها على وشك النزول فعلاً فتراجع سريعاً . وأنشغلت هى فى إعادة ضبط هيئتها وملابسها وأن تعيد كل قطعة لمكانها ..

ساعتها رن تليفونها وأخترقت النغمة الدينية المشهد  .. وأنطلق صوت المقرىء الشيخ محمد جبريل داعياً ومبتهلاً " اللهم استرنا فوق الأرض وتحت الأرض ويوم العرض عليك .. ألخ " ونفهم مما سبق أن الجزء الأول من الدعاء غالباً لم تتم الإستجابة له . حيث ينتشر هذا الفيديو بشكل كاسح على المواقع الإباحية  وشاهده تقريباً الملايين  .. مما يفيد بإنعدام الستر فوق الأرض .
 وإن كنا ندعو الله خالصين أن يغفر لها ولنا ويسترها ويسترنا تحت الأرض ويوم العرض إن شاء الله . وندعوه أيضاً أن يغفر لكل الخاطئين والخطـّـائين
ما سبق لا ينفصل عن واقع نعيشه كل دقيقة . بل هو يطابقه  تماماً
فكلنا ننصرف  إلى حقيقة أننا نسعى لأن نكون أكثر إلتزاماً وأكثر تديناً وأكثر محافظة وأكثر إتقاء وخشية لله

ولكننا مصابون بأمراض مجتمعنا هـذا , فنجد أنفسنا ننساق لتدين شكلى مظهرى يرضى غرورنا ويوحى لنا إننا على الطريق وإننا قد فعلنا ما علينا

وترانا قد أكتفينا بذقوننا التى اطلقناها ونراقب إزدياد طولها يومياً أمام المرآة ..
فنزداد بطولها حبوراً وسعادة وثقة

ونكتفى بالدعاء الذى وضعناه كنغمة لهواتفنا والخلفيات والبوسترات الاسلامية التى تزين جدران بيوتنا وأعمالنا

ونكتفى بالمصطلحات الدينية التى ألزمنا أنفسنا بها وصارت الفاظ  مثل
جزاك الله خيراً .. رفع الله قدرك .. أصلح الله حالك ..
صارت تجرى على ألسنة كثير منا والتى وإن كانت تأتى فى لغة عربية فصحى ولكنى بشكل شخصى أشعر بكم الزيف والتصنع فيها ومدى الخواء فى مضمونها عكس مصطلحات أخرى باللغة العامية ولكن كل حرف فيها يهيل عليك سلامة وطمأنينة ونور

وأكتفينا أيضاً بإتباع ما يقال عنهم شيوخ مهما قالوا .. فقط  ..
حتى نظهر أمام أنفسنا اننا هاهو .. اجتهدنا .. وسعينا لكى نصل لدرجة إيمانية أعلى وأفضل ونتصور أن بفعلنا ما سبق وغيره فقد أدينا كثيراً مما علينا ..
ونغفل كثيراً أن نفوسنا ودواخلنا وجوهرنا هى أبعد ما يكون ...  إلا من رحم ربى

وبذلك .. نصل لنتيجة بائسة
إن كارت الميمورى الذى نطق بالدعاء للمقرىء الشهير والذى اصبغ على الموبيل الصبغة الإسلامية المطلوبة قد اطمئن و تبوأ مقعده  فى الجنة
أما صاحبه .. فمازال يبحث عن مظهر أخر كى يصبغه بالتــدّين . 

مصطفى شوربحى
القاهرة فى 23/12/2012
الساعة 5:20 ص
صبيحة اول يوم بعد أن صوّت المصريين بالموافقة على دستور الأخوان

إعتذارصريح وواضح لأغلب مؤيدى مرسى والأخوان والاسلاميين بشكل عام

إعتذار حقيقى وواضح وصريح , لأنى ظلمتهم بصراحة  . كنت عندى تصور إن الناس دى بتعند لمجرد العند , وكنت متصور انهم متعمدين يختلفوا معاك لمجرد الأختلاف .. معارضة للمعارضة بمعنى اصح
بس اللى بكتشفه مع الوقت غير كده خالص .. الناس دى مش بيعندوا معانا ولا هما خالف تعرف وخلاص ,
وبجد هما ناس عندهم وطنية زينا واكتر شوية كمان  وطيبين جداً جداً , ومش بيكرهوا حد لمجرد الكره
الناس دى للاسف مظلومة بجهلها , ايوة جهلها .  بينعدم عندهم الوعى , وفاقدين لأى قدرة على التحليل وقراءة الواقع والمستقبل , مش بس كده .. هما كمان سطحيين للغاية وبينبهروا بسرعة بأى حاجة وللأسف نظرهم عمره ما قدر يشوف خارج إطار الصورة
وأغلب مؤيدى مرسى او الاخوان او الاسلاميين عموماً
  بينقسموا لـــ 3 انواع  ...
نوع منهم مؤيد لدكتور مرسى . مؤيد من باب الديمقراطية والحرية والأغلبية والفيلم ده . النوع ده غلبان خالص لأنه ما يعرفش الفرق مثلاً بين الديمقراطية الحقيقية والديمقراطية المزيفة , وهل الديمقراطية وسيلة أم غاية , أداة أم هدف
. هو إنسان مش مؤدلج  يعنى لا ينتمى لأى تيار سياسى او فكرى حتى  ...
وللأسف ده بيفخر كمان بلاإنتماؤه ده ... بيعتبره نوع من التنزه والتجرد والحياد
لو تابعت تاريخ النوع  ده .. هتلاقيه مع السلطة أينما حلت وأينما وجدت
يعنى هو كان مع مبارك لغاية ما الثورة قامت وكان شايف ان لو مبارك وحش زى الناس ما بتقول فده لأن الشعب هو اللى وحش والشعب هو اللى لازم يغير من نفسه وإن الفساد من الناس مش من السلطة , ولو شيلنا مبارك هنجيب مين يعنى ؟؟؟
ومبارك سرق وشبع خلاص .. هنجيب واحد عشان يسرق من اول وجديد وفى النهاية اللى نعرفه احسن من اللى ما نعرفوش
وكل التعليقات المشهورة دى
بمجرد قيام الثورة ... فجأة تم الأكتشاف العظيم وعرفنا ان مبارك كان وحش ...
مش عشان هو فعلا حاكم فاسد ومستبد ... لا عشان هو خلاص فقد الكرسى والسلطة ومش هايفرق معانا نقول اى كلام عليه
وللمصادفة الشديدة هتلاقى كل اللى من النوع ده  كان مع المجلس العسكرى فى كل قراراته وكان بيحاول يوجد له  مبررات فى اى حادثة تحصل وييجيب العيب على القوى الثورية اللى مش عارف عاوزة الجيش يرحل ليه ... أمال مين يحكم البلد .؟؟؟؟
وسبحان الله .. تحصل انتخابات ويفوز مرسى ويقيل طنطاوى وعنان والجيش يمشى والبلد تتحكم عادى جداً ولا كأن حصل أى حاجة
ويستمر المسلسل ... ويبقى مرسى هو الرئيس
وتبدأ نفس الأسطوانة المشروخة عاوزين ايه منه ... مش كفاية انه اخد قرارات ثورية وشال طنطاوى وعنان اللى كانوا فاسدين وكانوا وكانوا وكانوا ... خد بالك ان طنطاوى وعنان هما هما اللى كان بيدافعوا عنهم فوق من شوية وبيقولوا انتوا عاوزين تكسروا الجيش !!
الناس دى دلوقتى ... بتأيد مرسى من باب انه هو الرئيس وهو السلطة ويعمل اى حاجة حتى لو خالف القانون والدستور
ما تحاولش تقول قدامهم الكلام ده ... بتاع القانون والدستور والحاجات دى عشان مش هيفهموك
واوعى تقول ان مرسى مثلاً مثلاً مش من حقه يصدر إعلانات دستورية إلا بعد إستفتاء الشعب  !!
عشان هتسمع ردود من نوعية ازاى يعنى مش من حقه .. ؟؟؟ ومين قالك انه مش من حقه ... ؟؟
وبقية الحاجات اللطيفة الظريفة دى
كل قصتهم .... ازاى نسيب مرسى يشتغل وينضف البلد ... دول 4 شهور هيعمل ايه ولا ايه .. حرام عليكم ...

والنوع ده ملوش علاج .. وهيفضل مع السلطة ايا ما كانت ... فانتا اشتغل وغير وهات الرئيس اللى يعجبك وفكك منهم
والاكتر بقى انك فى يوم من الايام هتلاقيهم بيدافعوا عن نفس الرئيس اللى انتا جبته ده   لو انتا جيت مرة انتقدت تصرف له





نروح  بقى للنوع الثانى
هو متعاطف مع تيارات الإسلام السياسى بس مش مؤدلج .
 ده واحد بيعمل حاجات كتير غلط وبيعتقد انه لما يناصر او يصوت لصالح تيار اسلامى واجب دينى وشرعى كمان
 حتى لو هو مش بيعمل اى حاجة فيها ريحة الدين او الشرع كفاية ... بس اهو حاجة نرضى بيها ربنا
واحد منهم مرة قالى .. يعنى ان احنا بنعمل بلاوى ... وكمان مش هننصر الناس بتوع ربنا , اهى حاجة تشيل من علينا
المشكلة انه عشان ربنا يغفر له .. بيفشخنا احنا معاه ...
والنوع ده مش خطير ومفيش خوف منه ... وبيرضى بأى حاجة .. لأنه أصلاً معندوش معتقد معين ممكن يدافع عنه . وفى إمكاننا تقويمه فكرياً بسهولة . معظمهم حديثى عهد بالسياسة .. وقبل الثورة مكانش يعرف اى حاجة فى اى حاجة .. عمره ما قال كلمة على مبارك او نظامه او وزرائه اللى هو فالق دماغ ابونا دلوقتى بفسادهم وماسك لى فى رجال مبارك رجال مبارك .. كل دقيقة
من مميزات التصميم الجديد  لموقع الفيس بوك انه ممكن يسترجع الصفحة الشخصية لأى شخص حتى تاريخ ما قبل الثورة
جرب كده وهتلاقى نشاط البيه عبارة عن كليبات أو كلام عن الكورة أو اغانى أوصور تافهة
كان الفيس بوك عنده وسيلة للمرح مش اكتر .. وللتسلية , وكمان كانوا بيمتازوا يأما بالجبن الشديد او الجهل الشديد
يعنى لما مثلأ كنت أكتب حاجة ضد مبارك او جمال ابنه , أو خاصة بالسياسة عموماً .. يتجاهلها
إنما اى مجال تانى ... تلاقى المشاركات الله ينور ..



النوع الثالث ..
المنتمى لتيار الاسلام السياسى بشكل أيدولوجى
 الناس دى وبعد صعود تيار الاسلام السياسى وجدوا انه هو اقرب التيارات لأفكارهم وبدأوا الدفاع عن هذه التيارات والتقول بكل مبادئهم وافكارهم ورموزهم وشيوخهم
الفرق بيننا وبين الفئة دى
انك ممكن تتناقش معاه كويس جداً فى مسائل متعلقة بالتنظيم اللى بينتمى له سواء كان اخوان او سلفى او جهادى ..
وتصحح له معلومات كمان .. زى مثلاً هل طرأ تغير فى البنية الفكرية او التنظمية للأخوان ولا لا
بس هو عمره ما هيعرف يكلمك عن معنى الشريعة او فقه المقاصد والماألآت . عمره ما هيكلمك عن رأيه فى  افكار تقرب لأن تكون مذاهب فقهية بجوار المذاهب الأربعة الشهيرة زى ابن حزم والأمام النسائى والليث بن سعد .
تقريبا كل كلامه هيدور على ازاى الاسلاميين اتعذبوا وتم قمعهم وازاى ان الاخوان تنظيم قديم عمره اكثر من 80 سنة . ومن حقه اخذ فرصته فى الحكم ... وكأنها عجلة لازم يأخد بيها لفة
كتير منهم هيكون اول مرة يسمع عن حاجات زى  مثلاً الفرق بين السلفية العلمية ومركزها فى الاسكندرية والسلفية الجهادية ومركزها فى صعيد مصر .. انتا بتبقى عندك فعلاً معرفة عميقة جداً بالتيارات دى ونشأتها وتطورها ووو الخ
عكسه هو تماماً .. تماماً يعنى .. يعنى هو مايعرفش عن التيارات التانية غير انهم شوية علمانيين وملاحدة
حتى المصطلحات اللى اطلقها عليك دى عنده مشكلة فى شرح مضامينها
وعشان اثبت لك ده
 حاول بس تدخل معاه فى نقاش حول الليبرالية الكلاسيكية او الليبرالية الجديدة
جرب مثلاً تسأله هلا قرأ كتاب الحكومة المدنية لجون لوك .. او الاسلام واصول الحكم للشيخ  على عبد الرازق
جرب مثلاً تسأله عن الفرق بين اليسار واليسار الديمقراطى , عن كينز وادم سميث , عن الفرق بين الشيوعية والراسمالية
جرب مثلاً تسأله  يعرف ايه عن الاشتراكية غير انها مرتبطة فى خياله بجمال عبد الناصر
جرب وهتلاقى قدامك بنى ادم فاتح بقه مش عارف يرد على حرف واحد من اللوغاريتمات اللى فاتت
اللى عاوز اقوله ...
 ان اى حد قرر انه يكون ليبرالى او يسارى قبل ما يقرر ده بيكون قرأ كويس اوى عن الاسلام السياسى اكتر من ناس كتير منتمين للتيار ده .. فى الوقت نفسه اللى كتير جداً من المنتمين  لتيارات الاسلام السياسى مايعرفوش عن تنظيماتهم وتنظيمات منافسيهم
غير القشور
وعشان كده ... يجب الإعتذارالصريح  لهم عن سوء ظننا فيهم

شهادتى عن أحداث الإتحادية

قررت النزول تقريباً الساعة 6 بعد ما سمعت عن فض السفلة لأعتصام المعارضين لأعلان المجرم مرسى .
 نزلت محطة سراى القبة واتمشيت لغاية ما وصلنا شارع اسمه الشيخ نور بيطل على ميدان روكسى .. الشارع هادىء وسكانه أغلبهم ما بين الطبقة المتوسطة والعليا
الشارع مليان مجموعات من الشباب من اهل المنطقة ومن خارجها  زينا .. اللى نزلوا بمجرد ما سمعوا عن عصابات الاخوان والتيارات الاسلامية الاخرى وافعالهم فى محيط الاتحادية ..
كان فى كل الاعمار شيوخ وشباب واطفال .. ونساء الشارع لابسين اسدالات الصلاة وواقفين امام بيوتهم فى حالة رعب من صوت الخرطوش اللى بتضرب من اول الشارع من المؤيدين لمرسى . وفى نفس الوقت فى حالة ثورة من الناس كلها ضد الاخوان واتباعهم وحالة استنفار شديدة ضدهم وبالنسبة لى كان اول مرة اشوف مصريين اجتمعوا على كراهية تيار ما بالطريقة دى
 كنا واقفين عند اول الشارع فى مواجهة مجموعات غفيرة جدا من المؤيدين  رافعين أعلام سودا عليها الشهادة فعلا اعداد المؤيدين كانت اكبر مما نتخيل .. وكانوا من مختلف المحافظات والدليل على كده ان فى 2 اصدقائنا اتجهوا لإنقاذ سيارة واحد زميلنا كانت فى محيط الاشتباكات .. وقابلهم شاب اخوانى وسألهم يروح موقف عبود ازاى .. ومعروف ان موقف عبود خاص بمحافظات الدلتا
المجموعات المؤيدة للمجرم مرسى كان فيهم ناس ماسكين ميكروفون  وبيقولوا من خلاله نحن نحمى دين الله ..
فى الوقت اللى معاهم فيه كل الاسلحة من طوب لمولوتوف لخرطوش لقنابل غاز
واحنا واقفين فى مواجهتهم مش معانا غير طوب وبس وبعد كده الناس بدأت تفضى بنزين العربيات المركونة فى شارع الشيخ نور عشان تصنع مولوتوف وتبدأ تواجه شباب الأخوان المسلحين بكل الاسلحة
اللى لاحظته ان سكان الشارع كانوا بشتموا ويسبوا فى الاخوان وفى شباب التيارت الاسلامية كلها ... وعلى رأى واحدة ست كبيرة ... هو فاكرين نفسهم بس المسلمين
وفى لحظة من اللجظات وجدنا وسطنا شاب سلفى لابس قميص وبنطلون جينز وواضح انه دخل الشارع غلط .. بسرعة الناس كلها التفت حواليه .. سألوه .. انتا جاى من فين .. شكلك جاى من عند الناس اللى بيضربوا فينا ..
الشاب قالهم انه بيدور على اخوه .. والناس ماصدقتوش
وبدأوا يشتموا رداً على اللى بيحصل من شباب المؤيدين .. وبدأ هو فى الرد عليهم . وطبعاً الناس كانت على اخرها فاندفعوا من كل جانب للاشتباك معاه .. وسهل اوى انك تتوقع ممكن يحصل ايه لما اكتر من 20 شاب غاضب يلتفوا على واحد بس
شفت بعينى المنظر واتاكدت انى هاشوف مشهد قتل بدون شك .. جريت ناحية الشاب السلفى وحاولت ابعد الشباب الغاضب عنه على اد ما اقدر .. وللاسف حتى فى اللحظات دى هو ما بطلش شتيمة واستفزاز للناس ... والحمد لله قدر يهرب منهم ويجرى وبعدها كل الشباب عاتبونى ازاى تدافع عن واحد بيقتل فينا .. انتا لو روحت وسطيهم مش هيرحموك .. وفضلت اشرح لهم ازاى نقتل واحد لوحده كده لمجرد انه سلفى ودخل الشارع اللى احنا فيه بالغلط .. !! بس للاسف غضبهم كان اكبر من اى حاجة
لما الاشتباكات هدأت شوية وانتقلت لشارع الميرغنى ...
اتقدمنا لأول الشارع وفوجئت انى امام شاب سلفى ,, وقالى انا عارفكم انتوا بتوع حزب الدستور .. انتوا ناس محترمين على فكرة .. بس اللى بيضربونا دول بلطجية
قولت له هأسالك سؤال واحد .... انتوا ايه اللى جابكم النهاردة العصر تفضوا الاعتصام
قالى : عشان كنا فاكرين انكم هتقتحموا القصر ..
قلت : ومين قالكم اننا هنقتحم القصر ...
قال : جات لنا اخبار من القيادات بتاعتنا انكم هتقتحموه ..
قلت : وحتى لو ده صح ... هو ده واجبكم انتوا ولا واجب السلطات
قال : وعينيه فى الارض .. بصراحة هو مش واجبنا احنا ده واجب الشرطة

دى لمحة من يوم امس فى محيط قصر الإتحادية
و الحقيقة اللى اقتنعت بيها من اللى حصل
انهم جماعة واحنا شعب ... شعب بحاله
ومستحيل الجماعة تغلب الشعب .... مستحيل