وادى حلفا ( 1 - 3 )

                         وادى حــلــفــَـا ( 1 – 3 )

إذا تصفحت البرنامج الشهير (جوجل إيرث) و كانت وجهتك منطقة النوبة المصرية السودانية وتركز إستكشافك لمنقطة وادى حلفا القديمة ....
أو إذا مررت فى منطقة وسط المدينة فى الأسكندرية وتوقفت كثيراً أمام مقهى عتيق يحمل لافتة مهترئة بفعل الزمن تعلن عن أسم المقهى ( قهوة وادى حلفا ) فظللت تتحرى عن قصة الأسم وكيف أتى إلى هنا .. فيخبرك صاحب المقهى الصعيدى  إنه أشتراه منذ عقود وأصر على عدم تغيير الأسم ولكنه لا يعلم قصة هذه التسمية
يمكن صحابو من هناك ..... قالها بعدم إكتراث
او إذا شغلتك لافتة على طريق مصر إسكندرية الزراعى تحمل أسم قرية ( ميت حلفا ) وتسألت فى نفسك عن علاقة اسم قرية فى دلتا مصر بالمُسمى الأتى من 1600 كيلو متر او يزيد
أو إذا ظللت بأصرار غريب تخبر المقربين منك  أن نبيل الحلفاوى الفنان المصرى ربما تكون له جذور حلفاوية نوبية فتمت نسبته إليها حتى أصابهم الملل من تلك الحكاية المكررة دون أن تنتبه قليلاً أن معلومة مثل هذه قد لا تشغل بال الكثيرين ..
إذا ضبطت نفسك تفعل بعض مما سبق فأعلم إنك مضروب مثلى بهوى وادى حلفا .. ولما لا
وادى حلفا عروس  وادى النيل وفردوس نوبتنا الغريقة وحاضرة ممالكنا الغابرة .. هى عاصمة النوبة لا ريب
وادى حلفا رتب لها القدر موقعاً فريداً ,  أنتصفت  إقليم النوبة تماماً ,  يحدها من الشمال  مناطق الكنوز والعرب والفاديجا  فى مصر ومن الجنوب مناطق السكُوت والمحَس و دُنقلا فى السودان . واقعياً تركزت فى وادى حلفا الخدمات الحكومية المصرية زمناً والسودانية بعد حين مكتب البريد و المستشفى  والسوق الكبير و مصلحة السكك الحديدية و المحاكم و ملعب كرة القدم وميناء وادى حلفا النهرى و مطار وادى حلفا هى عناصر مكتملة لعاصمة تنبض بالحياة
مدينة نوبية عصرية فيها المطار والأحياء السكنية الراقية كالتوفيقية والعباسية  والميادين رائعة التخطيط والطرق الاسفلتية المعبدة النادرة فى ذلك الزمن
تقف جنباً بجنب بجوار حواضر ذلك الزمن الأسكندرية والقاهرة
بديهياً هى الخسارة الأعظم لنا كنوبيين فى قرن الخسائر والآلام .. القرن العشرين
ويأتى تأرجحها بين الإدارة المصرية والسودانية فيما يجعلك تتساءل هل حلفا مصرية أم سودانية وإن كنا لا نملك شكاً فى نوبيتها القُح  فهذه الحقيقة الأبرز والأوضح .. حلفا نوبية
 يأتى تأرجحها هذا بين الإدارتين ليمنحها وضعية خاصة جداً بين كل المدن المصرية والسودانية
لو اتيح لك الرجوع لأتفاقية الحكم الثنائى ( يناير 1899)  الموقعة بين حكومة صاحبة الجلالة ملكة بريطانيا و وحكومة الخديوى عباس حلمى الثانى والى مصر والتى شطرت الجسد النوبى نصفين ووزعته  بين مصر ودولة السودان الوليدة تجد ان الإتفاقية أستبقت حلفا داخل الحدود المصرية - خط دائرة عرض 22 - ثم جاء ملحق الإتفاقية ( مارس 1898) ليستقطع وادى حلفا من مصر ويمنحها للسودان بالأضافة لعشر قرى تبدأ من فرص غرب وتنتهى فى حلفا دغيم بناء على خطاب قومندان حلفا لوزير الداخلية المصرى وقتها ....
 الونسة حول وادى حلفا لم تنته .. ونستكمل العدد القادم


ينشر بالتزامن مع النشر كمقال فى جريدة صوت النوبة 

خواطر متمردة عن 30 يونيو و 25 يناير

بادى ذى بدء .. زى ما بيقولوا
30 يونيو هو الموجة الثالثة لثورة 25 يناير العظيمة , كل ثورات العالم للى متابع وعاوز يعرف بتمر بمراحل مد وجذر و موجات متتالية تمارس فعل الفرز والغربلة باستمرار حتى تصل للأهداف الأصلية من قيام الثورة فى الاساس , والثورة اللى بتم مراحلها بنجاح وقتها بس نقدر نطلق عليها الثورة الناجحة وبتتخلد فى ذاكرة الشعوب والأمثلة كتير ... الثورة الفرنسية والروسية والامريكية
يلزم هنا التأكيد على أن 30 يونيو حلقة من حلقات 25 يناير لا إنفصال مطلقاً , ترتبط بها ارتباط الأم بطفلها
 لو لم تكن أم لم يكن هناك طفل , تتجلى فيهما التراتبية والتلازم والمشروطية .
اقول يلزم التأكيد حتى يعرف  ويعلم حديثى النزول للشارع و من رأوا الشمس لأول مرة يوم 30 يونيو انهم يشاركوا فى حدث بدأ  فى الأصل أبان شتاء 2011 . هم لم يخلقوا حدث جديد , هم مشاركون فى إستكمال حدث قديم , خدمتهم الظروف وشاءت ان يظهروا فى البرواز
اقول هذا و وادعو الله ان يعنينا على  قضاءه المحتوم علينا فى مواجهة نوعين من البشر وان يكون لنا عونا فى عناء شرح عديد من المفاهيم لهؤلاء
نوع يرى ثورة 25 يناير مؤامرة و نكسة وفعل مخابراتى
ونوع تانى يرى ان 30 يونيو رجس من عمل الشيطان وفعل كُفرى وفى أفضل الأحوال نفاق و نكوص عن الثورة وتخلى عن اهدافها
لهؤلاء ولهؤلاء نقول ....
هى ثورة واحدة يقيناً مرت بثلات مراحل اولها الخلاص من فكرة التوريث للأبد ومن شلة فاسدين تجمعوا تحت لواء سمى الحزب الوطنى  ذهب إلى مكانه فى مزبلة التاريخ غير مأسوف عليه  وبلا رجعة
مرحلتها الثانية قضت على أحلام عسكر مبارك فى السيطرة على حكم البلاد بعدما اراهم شباب الثورة النجوم فى عز الظهر واضطروا فى يوم مشهود من ايام محمد محمود  المجيدة ان يلموا اسمالهم البالية ويهرعوا خارج المشهد معلنين ان 30 يونيو 2012 سيتسلم الحكم رئيس مدنى بعد انتخابات نزيهة بعدما كان الموعد فى 2013 وكان قابل للتأجيل رغبة منهم فى التسويف و إستمالة الشعب عبر سلسلة من الأفاعيل المخابراتية من كوارث قتل وفتنة طائفية متكررة و ترهيب الشعب وتخويفه حتى يرضخ فى النهاية لحكم الجنرالات
المرحلة الثالثة والتى ارتدت زوراً وبهتاناً زى ديمقراطى شكليا كان عنوانها الخلاص من جماعة الاخوان المسلمين شريك الحزب الوطنى فى حكم البلاد وربيبهم الاثير ومحلل انتخاباتهم وشريك صفقاتهم فى مكاتب امن الدولة  و فزاعاتهم المصدرة دوماً للغرب .

عبر تلك المراحل تستمر الثورة فى طريقها كقطار ماضٍ لايصده شىء ولا يعوقه عائق .  ترى داخل هذا القطار بعض من الحالمين اصحاب الخيال الذين اصابهم مسّ من جنون جعلهم اسرى امكانهم داخل قطارهم لا يملكون منه هبوطاً إلا فى نهاية رحلته الطويلة وما بدلوا تبديلا ...ولا يسألون من الراكب ومن اى محطة ركب , ولا يسألون من ترك القطار وفى اى محطة ترك
فقط يسألون .. كم تبقى من رحلتنا ؟


اللى حصل فى 30 يونيو ده شرعى ولا ؟؟؟
سمعت اكيد كلام كتير عن الديمقراطية والشرعية والصندوق و و و و , وازاى ان الناس اللى طول عمرها بتتكلم عن الديمقراطية هى اللى خرجت عليها وكلام كده كتير خرج من ناس تقريبا تعرفت على الديمقراطية من كام يوم , وتقريبا اخدوا فكرتهم عن الديمقراطية والصندوق من على وش القفص ومن العناوين ومحدش كلف نفسه يتعمق شوية فى التعرف على المفاهيم دى .. ونسال ربنا انه ينوبنا ثواب توصيل بعض المفاهيم البسيطة دى
فى حاجة اسمها الديمقراطية المباشرة والديمقراطية الغير مباشرة , بلاش نتكلم ونتعمق فى الانتخابات الرئاسية المبكرة والمسئولية الأدبية الملقاة على عاتق رئيس او حزب نجح بفارق 1% فى انتخابات اتت بعد ثورة شعبية حاشدة , بعضهم من العمى من ان يرى تلك التفصيلة المفصلية
نبدأ بالديمقراطية الغير مباشرة
هى ليها اسم تانى الديمقراطية التمثيلية او النيابية بمعنى ان الشعب بيروح يفوض ناس تتكلم بأسمه سواء نواب  او رئيس وده بيحصل من خلال صندوق كشىء من التنظيم بدل ما الناس تخرج تقول كلها فى الشوارع هى عاوزة ايه ومطالبها ايه  , لأن خروج غالبية الشعب  للشوارع فعل غير مأمون العواقب بالأضافة انه يعطل مصالح البلاد و ممكن ينتج عنه احداث عنف وكده ,
 فاللجوء للصندوق هو فكرة تنظيمية بديلة تم اللجوء إليها  لتفادى الخروج للشارع كل يوم ..
ولكن إذا حضر الماء بطل التيمم . واذا خرجت الأغلبية بشكل جلى وواضح  سقط الصندوق
وفى حالتنا خرج للشارع ملايين المصريين فى مختلف نواحى القطر المصرى معلنين بصوت هادر رفضهم للنظام الحالى
خرجوا ممثلين لكل اختلافاتهم وطوائفهم و مذاهبهم .. فى الدين والنوع والطبقة والمستوى الاجتماعى والاقتصادى
ودى اللى اسمها الديمقراطية المباشرة التى بيمارسها الشعب بنفسه ويعلن فيها عن رأيه بنفسه وبصوته دون حاجة لممثل عنه
طبعا مش هدخل فى تفاصيل سخيفة من نوعية مين اللى نزلوا وشكلهم ايه
اما اللى شايف وبيحصر المشهد انه عداء للأسلام وكراهية للدين ..
 ف اعتقد انه مش محتاج منى غير الدعاء الخالص انه ربنا ينور بصيرته ويوسع مداركه


قصة الإخوان والثورة وشفيق والفلول
شخصياً لما وصلنا للإعادة قررت المقاطعة  لأنى حسمت امرى
سواء وصل شفيق او مرسى فالأتنين عندى واحد وأى حد فيهم هيتولى الرئاسة مباشرة هاخد مكانى فى الشارع معارضة له وهسعى جاهداً لإسقاطه ..
ف مش هتفرق كتير من جاى رئيس  .. كده كده الاتنين لازم يسقطوا
ذوى النوايا الحسنة بقى توجهوا وعصروا لمون وجابوا مرسى والاخوان إعلاء للثورة وحق الشهدا وكده
طبعا انا من رأيى ان الاخوان لا علاقة لهم بالثورة ... مش علاقة مشاركة , لانهم شاركوا بالفعل
ولكن علاقة ايمان بيها ورغبة فى تحقيق اهدافها ...
ببساطة لو الإخوان مؤمنين بالفعل الثورى كانوا ثاروا من زمان , الاخوان وعلى حد زعمهم وطبقا لعدد الاصوات اللى حاز عليها مرسى فى الجولة الاولى تقريبا 5 مليون صوت
لو الاخوان ترغب فى الثورة وترغب فعلا فى انهاء دولة الفساد و التوريث كانت وجهت اعضاءها الــ 5 مليون للنزول للشارع فى كل مصر مهما كانت التضحيات ومهما كانت التحديات  سعياً ثورياً نحو التغيير , طبعا اوعى تسمع رأى بيقولك انهم خافوا من التصفية والتضحية بيهم وتسكت
اللى يقولك كده اوعى تسكت له  .. وقول له إن اللى  مقتنع بفكرة لازم يسعى لتحقيقها حتى لو مات فى سبيلها
انما هتقولى كانوا خايفين من التصفية او هتقولى رفضوا يشاركوا يوم 25 عشان خافوا من التضحية بيهم هتضطر اقولك لفظ مش لطيف
لأن عصام العريان وقتها رفض انه يشارك فى المظاهرات رسمياً وقال إن الأخوان لن يشاركوا فى حدث لا يعلموا من الداعين له
كأنه فرح بروح امه ولازم يعرف مين الداعى ومين المدعو , مش بس كده عصام العريان وقتها عرض قائمة من 10 طلبات للنظام حتى يتفادى غضب الشارع .. كمان كان بيقدم للنظام مخرج
ثم فى حاجة أهم
 هما الشباب اللى اعلنوا عن نفسهم وقالوا انهم نازلين 25 يناير عشان حلم التغيير دول مش بنى ادمين وحياتهم غالية برضه ولا ايه
المهم  ... اللى حصل حصل والاخوان لما شافوا ملامح النصر فى 25 يناير قرورا النزول يوم 28 وشاركوا فعلا فى الثورة
ولكن .. لتحقيق اهداف الجماعة من خلال الثورة وليس تحقيق اهداف الثورة
وده اللى وضح بشدة لما تولوا الحكم على ايد مرسى ..
ويكفى موقف واحد بس عشان تعرف الفرق الكبير والبون الشاسع بين اهدافهم واهداف الثورة
لما يتعين واحد اخوانى رئيس مجلس ادارة الاهرام بدون اى معايير مهنية  , متخطياً اسماء كثيرة احق بهذا المنصب
لازم تعرف على طول ان فى حاجة غلط , وان ده إشارة لغياب تام لمفهوم الثورة واهدافها
لو ذكرنا المواقف اللى شبه الموقف ده هتعرف وهتفهم كويس جدا  انه مفيش اى علاقة بين اهداف الجماعة واهداف الثورة
وعشان كده ..... كان لازم تخرج الجماعة من المشهد بشكل او بأخر حتى تستطيع الثورة ان تستكمل طريقها
ويشاء العلى القدير ان رحيل الأخوان يكون هدف مشترك للشباب الثورى و أجهزة امنية سيادية ما
هتقولى بقى صندوق وشرعية ودستور مستفتى عليه
هقولك معنى كده ان هدفك كان الصندوق مش الثورة ... رغم ان الصندوق  لال يتعدى كونه مجرد وسيلة للوصول لأهداف الثورة
ولو الصندوق اخذنا بعيداً عن طريق الثورة وعن اهدافها اللى قامت عشانها  يبقى فى داهية 100 صندوق مش صندوق واحد


الثورة والشريعة ..
كل اللى نزل فى الثورة يوم 25 يناير فاكر كويس ايه كانت ايه مطالبنا .. عيش وحرية وعدالة اجتماعية وكرامة انسانية
مشكلتنا مع مبارك مكانتش مع الدين خالص .. مشكلتنا كانت فى الفساد والتوريث والاستبداد وعدم تداول السلطة
اه كان فى ناس عندهم مشكلة مع مبارك فى الدين .. بس الناس دى كانت ملتزمة بمساجدها وبتحرم الخروج على الحاكم وكانوا بيقولوا نصبر ونغير من نفسنا وكده .
اللى حصل من الناس دى نفس اللى حصل من الاخوان
استغلوا الثورة وشاركوا فيها عشان يحققوا حاجات كانوا بيحلموا بيها لها علاقة بالدين والشريعة وكده , ولاقوا ان الثورة فرصة ذهبية لتحقيق الاحلام دى
بغض النظر بقى عن اصحاب الثورة واللى كانت مطالبهم واضحة جدا وكانت ابعد ما تكون عن الشريعة والثورة الاسلامية وتحكيم شرع الله .
الناس دى طبعا من حقها تحقق اللى بتحلم بيه .. وممكن يجمعوا نفسهم ويقوموا بثورة اسلامية ويقنعوا ملايين المصريين ينزلوا معاهم ويطالبوا بنفس المطالب وساعاتها لو نزل معاهم غالبية المصريين هيبقى مطلب شعبى ولابد من تحقيقه فورا
انما استغلال ثورة يناير واستغلال خاطىء لصندوق خلقته ثورة يناير  لتحقيق احلام خاصة بيك وبجماعتك .. هى دى المشكلة

وعشان الأفكار دى ...
هتفضل الازمة موجودة ومش هتنتهى  بين شباب الثورة والتيارات الدينية
التيارات الدينية شايفة ان الثورة فكرتها انها تحقق اهدافهم ولو اتحققت اهداف الثورة فى السكة يبقى خير وبركة
انما الشباب اللى دعا وكانت لهم المبادرة فى الثورة شايفين ان الثورة لها اهداف محددة دونها الموت
هتقولى بقى صندوق , ديمقراطية , شرعية وكده
هقولك زى ما بيقولوا ده قول حق يراد به باطل
وكل ما هو دون اهداف الثورة .. فهو باطل 

ماذا تعرف عن فـتـح الله كـولـن .. ؟

المسلسلات التركى .. جملة مفيدة .. لأنك عند تقرأها , سيستدعى عقلك الكثير .. 
سيستدعى تلك البلد الساحر فى طبيعته , أهلها ذو الأغلبية المسلمة الذين تتطابق معظم عاداتهم معنا , التطور الرهيب فى مناحى الحياة فيها ,و مهند .. 
يمكنا القول اننا نعيش عصر التغول والغزو التركى الناعم العميق للدول العربية  , ونظرة سريعة لأعداد السائحين العرب الذين زاورا تركيا خلال العشر سنين الأخيرة كفيل بالرد على أسئلتنا , أصبح من المعتاد ان يذكر لك البائع فى المتاجر القاهرية ان البضاعة التى فى يديك صناعة تركية كـ دليل لا يُرد عن الجودة والإتقان  ( صناعة  بنطلونات الجينز على سبيل المثال ) .
 كما أفتتحت فى القاهرة مؤخراً سلاسل متعددة من المطاعم التركية أو التى أتخذت أسماء مدن تركية و التى اتبعت النهج السائد فى تركيا من حيث تقديس العلم التركى حيث صار من المعتاد ان نرى العلم الأحمر ذو الهلال والثلاث نجمات فى شوارع القاهرة الكبرى على واجهات هذه المطاعم . وإلى ذلك يتوالى الحديث ليل نهار عن وجوب الأستفادة من التجربة التركية فى النهوض الإقتصادى  وخفض معدلات العجز فى الموازنة وتسديد الديون الخارجية ورفع مستوى الدخل القومى والفردى والطفرة الهائلة فى معدل النمو . لست هنا فى موضع نقد لظاهرة الغزو التركى للمجتمعات العربية ومن المستفيد من تلك الظاهرة العرب ام تركيا . ولكننا هنا لطرح سؤال أخر .. 
لماذا انبهرنا بتركيا الإقتصاد و السياحة والأكل والملابس و العادات ووووو .. الخ , ولم يلفت نظرنا الإسلام التركى . الإسلام التركى الذى ينتمى لنفس العائلة التى ينحدر منها الاسلام المصرى و السورى .. إسلام الحضر والأراضى الخصبة , إسلام تتداخل فيه مضامين الصوفية مع تفقهات اصحاب المذاهب الأربعة 
نعم .. يوجد إسلاماً تركياً مختلفاً عما نراه الأن فى مصر .. عفواً الإسلام واحد ولكن المقصود أننا فى تركيا نجد خطاب وتعاطى للأسلام كنص وكفقه يختلف تماماً عن الخطاب والتعاطى مع نفس الدين لدينا الأن ..
و اعتقد ان السياحة داخل دروب هذا الخطاب - فى ظروفنا هذه - اكثر فائدة بكثير من السياحة على ضفاف البوسفور او إرتداء الأزياء التركية الراقية أو مشاهدة مهند وفتياته . 

الدعاة فى مصر نوعان لا ثالث لهم 
دعاة سلفيون تجمعهم نفس الهيئة الخارجية من حيث الطرحة الشاش البيضاء واللحية المعفاة والجلباب الأبيض والأهم من ذلك يجمعهم نفس الإنتماء الفكرى والمذهبى للمدرسة السلفية الوهابية فى شبه الجزيرة العربية تلك المدرسة النصّية التى لا ترى من الدين سوى المظهر و القشور فى الأغلب . 
النوع الثانى الدعاة الشباب المودرن خريجى الجامعات الأمريكية والكليات النظرية المصرية  الغير متخصصة فقهياً , الذين يرتدون الملابس الشبابية ويقدمون الدين فى ثوب عصرى جذاب بالنسبة لبعض الشباب , ولكن تبقى الأزمة أنك لا تثق مطلقاً فى  اوزانهم فكرياً وفقهياً  .  

أما الدعاة الأزاهرة .. فهم بالفعل يمتلكون فقهاً وعلماً تثق به ولكن هم من الضعف مما ينعدم أثرهم على الشارع المصرى ولذا هم خارج التقييم 

نعود عبر المتوسط مرة أخرى إلى تركيا .. لنتعرف على داعية من نوع مختلف 
إنه فتح الله كولن 

إنه ليس مفكراً نظامياً .. لكنه واعظ صاحب كاريزما ..
هكذا يوصفه راينرهيرمان فى كتابه الشيق عن تركيا .. ويسهب الباحث الالمانى المهتم بالشئون التركية فى الحديث عن فتح الله كولن
- اعاد فكرة التدين إلى الناس واصبح واعظ الحداثة الاسلامية يريد ان يقود الناس للحداثة دون ان يتخلوا عن عقيدتهم .. دمج العقيدة وتقاليدها فى انظمة الحداثة وفى نفس الوقت .. لم يقترب من السياسة شبر واحد وهنا الفرق
الاسلام يتطور اقليميا بشكل مختلف فهو فى افغانستان يختلف عنه فى افريقيا وفى البوسنة يختلف عن بنجلاديش ويختلف بالمثل فى تركيا التى له فيها تجربة فلا توجد دولة اخرى شعبها مسلم وتطبق قانوناً علمانياً وسياسة علمانية سواها
يضع فتح الله كولن ثلاثة اهداف كبرى نصب عينيه
1- اسلام حديث يمزج بين الحضارة التركية والحضارة الغربية
2- ترسيخ هذا الاسلام داخل الاتراك فى انحاء اوربا
3- تعزيز الاسلام التركى وتفرده فى مواجهة اسلام عربى سنى واسلام فارسي شيعى
يسعى كولن من اجل الحوار بين الاتراك المسلمين والديانات الغير مسلمة حيث كان اول رعيم دينى اسلامى يزور البطريرك المسكونى رئيس المسيحين الارثوذكس فى مقره فى حى فنار فى اسطنبول ...
اهم وابرز  رسائل كولن لشعبه نصيحته التاريخية بأن ينبغى ان يعيشوا الاسلام كافراد .. وألا يسعوا لنظام حكم اسلامى لأن الله يحاسب الناس حسب اعمالهم وليس حسب نظام الحكم الذى يعيشون فيه . ولا تشغل القضايا السياسية بال كولن مثل تطبيق الشريعة الاسلامية مثلاً ... وانما يشغله القضايا الاخلاقية والتعليمية
ويرى كولن ان الدين هو الطاقة الاكثر تأثيراً وراء كل تقدم وصرح فى حوار له نشر فى صحيفة زمان التركية على عشر حلقات ان الاسلام ليس به عائق للديمقراطية .. كما ان الديموقراطية تحتاج لبعد ميتافيزيقى يوفره الاسلام ويؤكد ان الاسلام اوصى بنظام حكومى يقوم على العقد الاجتماعى وو عقد بين الدولة ومواطنيها بحيث تسفر الانتخابات الحرة عن ارادة الناس ويرسخ للمبادىء الانسانية مثل حرية الرأى والعقيدة بحيث لايمكن وضعها محل تساؤل .
وفاجأ مواطنيه فى حوار اجراه عام 2004 انه لا يعرف ما يسمى بالعالم الاسلامى وانه تراجع عن مفهوم الامة الاسلامية .. انه يعرف فقط اماكن يعيش فيها مسلمون . هو يريد اسلاما متجدداً طول الوقت منفتحاً على خبرات كل زمان ومكان اسلام يناى بنفسه عن ارهاب المتعصبين ... كولن واضح جداً وصارم فى موقفه من التيار المتشدد ولا ينسى كثيرون وصفه لب لادن " بالمسخ " الذى لطخ صورة الاسلام . واعلن خشيته من ان يستغرق الامر زمنا قبل ان يرفع هذا الضرر عن الاسلام .
ويرجع كولن السبب الاساسى فى ظهور المتطرفين إلى نظام التربية والتعليم

لا يمتلك كولن سوى مكتبة متواضعة ولا يظهر اسمه على اى مدرسة او مؤسسة او قناة تليفزيونية وانما تنتشر افكاره بشكل مستقل بفعل محبيه ومريديه حيث تنتشر المدارس التى تنشر فكره فى معظم الدول العربية ودول اسيا الصغرى وبعض دول اوربا وامريكا
وتتحدث بأفكاره كبرى الصحف والقنوات الخاصة فى تركيا بعد أن وهب أصحابها أجزاء معقولة من  أموالهم لنشر افكار وتعاليم هذا الواعظ الجليل .

فتح الله كولن فى أمريكا
استشعر النظام العلمانى المتطرف الخطر من دعوة فتح الله كولن والتى اخذت فى الانتشار فى نهاية العقد الثامن من القرن الفائت , فتم التضييق عليه وتوقيفه بحجة تهديد النظام العلمانى فى تركيا , وتم حبسه لفترات متقطعة رغم ان منهج كولن فى الدعوة لا يتعارض مع النظام العلمانى للدولة .. ولكن الكماليون فى تركيا الذين تبنوا منهج علمانى متطرف فى إدارة البلاد منذ سقوط الخلافة لم تعطى الفرصه لكون أن ينشر دعوته بين أبناء وطنه , وقبل أن تأخذ ما سبق ذريعة ضد العلمانية تذكر اننا وصفناها بالمتطرفة لأن فتح الله كولن عندما أختار ان وطن بديل يعيش فيه .. أختار امريكا البلد العلمانى أيضاً ولكن ليس متطرفاً .
وبعد وصول حزب العدالة والتنمية لسدة الحكم فى تركيا بقيادة أردوغان أصبح الظرف موات لعودة المهاجر لأرض وطنه , وإنهاء سنوات من الغربة والعودة لأرض وطن احبه كثيراً

شاهد هنا كيف رد فتح الله كولن على دعوة أردوغان له بالعودة وإنهاء سنوات الغربة ...
فقط أنسى كل ما قرأت فى هذه التدوينة ..
 ف مشاهدتك لرد كولن على دعوة اردوغان بالعودة لتركيا يكفى

تعرف أكثر عن فتح الله كولن
http://www.r-alnoor.com/vb/showthread.php?t=44

http://www.majalla.com/arb/2012/06/article55236056

مصطفى شوربجى
13/5/9

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مصادر
تركيا بين الدولة المدنية والدولة الدينية - الصراع الثقافى فى تركيا
لــ راينر هيرمان ترجمة عــُــلا عادل
الكتاب مفيد جدا لكل مهتم بدراسة التجربة التركية

صفحة فتح الله كولن على موسوعة الويكيبيديا

حوار لفتح كولن مع جريدة الشرق الاوسط 

سـيـجـارة كـلـيـوبـاتـرا ...

أنا برضه مش بحب الولاعة ..
بتخلى الدنيا سهلة كده , مجرد تكة بسيطة تلاقى السيجارة ولعت , ده كمان طلعولنا الولاعة السخان عشان يوفروا عليك تعبك لما بتحاول تدارى على نارك من الهوا .
هما عاوزين كل حاجة سهلة , من غير تعب , تتعمل بسرعة .
وانا مش بحب كده
كمان مش بحب السجاير الأجنبى تلاقى السيجارة كده متظبطة ومتساوية والمكنة مطلعة التبغ مسطرة .. مش محتاج اى حاجة . وده برضه عشان متأخدش وقت فى تظبيطها .
وهووب تحط السيجارة فى بقك وبسرعة ولاعتك السخان تشعلها , وبسرعة تشربها , وبسرعة تشرب السيجارة اللى بعدها , كله بسرعة وبسهولة ..
وانا مش بحب كده .
انا اصلا مش بحب السجاير .. انا بحب الحالة .
وعشان كده سجايرى كليوباترا .. وعادية كمان مش بوكس
علبتها صعبة الفتح ولازم تفضل تسيح فى البلاستكاية اللى مغلفة العلبة بالكبريت , وبعد كده تفتح جزء صغير وتفضل تخبط كده بصباعك على العلبة من فوق عشان باقى السجاير ينتخبولك سيجارة فتطلع السيجارة واحدة واحدة وتستلمها وتبدأ تفرك فيها من فوق ومن تحت عشان التبغ يتوزع صح , وبعد كده توقفها على ضهرها وتبدأ تخبط بيها على ضهر ايدك , عشان التبغ يترص مظبوط , وفين وفين لما لما تحطها على طرف شفايفك وتطلع كبريتك الأمشاط مش العلبة وتنزع مشط وتحطه ما بين سبابتك والوسطى وتبدأ تشط مرة و التانية والتالتة ..
ثم المشط ينوّر , ثم تقربه من سيجارتك
ثم التبغ يشمّه , ثم تسمع صوت التبغ وهو بيشتعل
ثم تاخد أول نفس ويبقى طويييل حبتين
ثم تستنى حبة , ثم تنفثه براااحة , ثم تتكيف من السيجارة
ثم تعلن إنك بتعشق الحالة مش السيجارة .

الـعـلـمـانـيــة .. جميع الحقوق محفوظة

طيــب .. واحـدة واحـدة .. وبهــداوة كده 

ربــنـــا عزّ وجلّ خلق الأرض .. 
وخلق عليها المسلمين والمسيحين واليهود والبهائين والمجوس والبوذيين 

وكمان خلق اللادينـيـن ... 
اللى هما معترفين ان فى خالق لهذا الكون , ولكنهم غير مؤمنين بالأطــر الدينية الموجودة 

مش بس كده ربنا خلق كمان الملحدين .. !!!
اللى مش معترفين اصلاً بوجوده سبحانه.. تعالى وتنزه وتناهى 
واكيد اكيد لما ربنا خلقهم .. كان يعلم انهم هيصبحوا كما صبحوا 

بس الفكرة بقى ... 
انه اولاً .. 
تركـهــم مـوجـوديـن معانا لغاية النهاردة .. تخيل دى 
تخيل إنــه لم يهلكهم على سبيل المثال 

ثانياً بقى وده الأهم ... 
خلـقـهـم على هيـئـة بـشـر .. وهبهم عيـون وألـسـن وآذان و عـقـول وقـلــوب 
زيـهـم زى المـؤمـنيـن بالـظـبط 
لم يخلقهم علـى هيئـــة قــــرود مثـــلاً للتفرقة بينهم وبين المؤمنين 
خلقهم متســـاوون تماماً تماماً كأسنان المشط , منحهم حقوقهم كاملة ككل البشر 
لا فرق إطلاقاً إطلاقاً .. "واخد بالك انتا من إطلاقاً دى " 
بينهم وبين اى مؤمن .. و أعتقد انى دى سنة ربانية فى خلقه 

الأكـثـر من ذلك .. 
عندما امتكلوا أسباب القوة نـصـرهم علـى المؤمنـيـن فى الحـيـاة الدنـيـا . 

لسه مفهمتش انا عاوز اقولك ايييييييييه ؟؟؟؟ 
انا قلت الكلام ده كله .. عشان اقولك حاجة بسيطة 
بأى منطق يا بنى ادم انتا عاوز انتا تخالف السنة الكونية دى 
ومين اعطاك الحق أصلاً إنك تفرق بين بنى ادم وبنى ادم على اساس عقيدته .
وتمنع عن بنى ادم حق .. وتمنح غيره نفس هذا الحق .. 
لمجرد انه مش مؤمن ,, أو مؤمن بعقيدة تختلف عن عقيدتك 

كلمة أخيرة بقى ... 
العلمانية .. هى الجزء اللى انتى قرأته فوق ده .. 
تصدق انتا المعلومة دى :) اه والله هى دى العلمانية 
لو مش دى العلمانية ,,, تبقى العلمانية ايه من وجهة نظرك

ونهاية .. فإن الله تعالى أعلى و أعلم ..
وإن كنت قد أصبت فيما سعيت إليه , فإننى أسجد لله حمداً وشكراً
وإن كنت قد أخطأت .. فإننى أسجد له سبحانه , ملتمساً العفو و المغفرة

سواق تاكسى أبيض ..

فضلت واقف شوية عشان أختار عربية تكون نضيفة كده ومتروقة .. لغاية ماجات الفيرنا النضيفة
- العجوزة يا أسطى .. ؟
- تعالى يا باشا ..
- تسلم يا عمنا
اول ما تشوفه كده تحسه من منطقة شعبية بس أصيلة يعنى من عابدين او السيدة زينب  او شبرا كده يعنى , فى الاربعينات تقريباً وبيشرب سجائر مارلبورو أحمر , مش حاطط مصحف على تابلوه العربية , بس  مؤشر الراديو كان على القرآن الكريم , تحس من شكله وطريقة تعامله مع العربية انه صاحبها مش شغال عليها , وبسرعة سألنى ..
- فين فى العجوزة يا باشا ..
فين فى العجوزة .. فين فى العجوزة .. ثوانى هقولك
- لا براحتك وعلى مهلك .. وأمرنى وانا تحت أمرك
- شوف هو بالظبط عند اخر سور مستشفى العجوزة .. عـنــ ولم أكمل حتى رد بسرعة
- عند شارع الفالوجا ..
- الله ينور عليك ...
سكتت شوية وانا حاسس انه عاوز يقول حاجة ... فقررت انى انتبه عشان اشوف هيقول ايه , هيتكلم فى السياسة ولا فى حالة الجو  ولا فى الكورة , مع مرسى ولا ضده , بيأيد الأخوان ولا نفسه يغوروا فى داهية والجيش يمسك البلد .
بس اللى حصل انه خالف كل توقعاتى ..
- تصدق بالله يا باشا البنى ادم ده عدو نفسه ..
- لا إلا اله الله .. ليه بس بتقول كده
-يابشا  العربية تكون بتاعتك , وانتا مالك أمرك وفجأة تتجنن فى عقلك وتروح تسملها لواحد يشتغل عليها وبعد كده يذل اللى خلفوك . انا بقالى 20 سنة شغال سواق تاكسى لغاية ما واحد حبيبى جه كلمنى على شاب ظروفه صعبة ولسه متجوز .. وقالى اسلمه العربية يشتغل عليها .. فى الاول اعترضت .. بس هو فضل يقنع فيا وقالى  انى هكون باشا ..
وراح قايلى ده الواد هيجى ياخد العربية منك  ويجيبهالك  اخر النهار ومعاها وردية 75 جنيه ,  وكمان متفولة بنزين .... وحش ؟؟ لامؤاخذة يا باشا كلامه لعب بدماغى حبتين ... وروحت  قلته لا ....  مش وحش
بينى وبينك انا قلت اجرب ..
 وفعلاً سلمت العربية للواد , وهو بأمانة الله وعشان الواحد يكون صريح مع  نفسه .. كان ماشى زى الأكس ( كلمة الأكس اختصار لكلمة اكسبريس ومقصود بيها قطار الاكسبريس الذى لا يتوقف إلا فى محطة الوصول )
كان بيغسل العربية كل يوم ويروشها ويحط فيها فواحات ريحتها حلوة ,  وكان يجيلى فى اخر اليوم ومعاه الــ 75 جنيه ويروح سايب لى  المفتاح , حاجة كده زى الجلاش .. وفضلت عالحال ده شهر ... 30 يوم بالتمام والكمال
مكدبش عليك .. انا كمان فى الشهر ده حسيت بحاجة مختلفة , حسيت انى بقيت واحد تانى  .. اصحى من النوم براحتى , جسمى مش هلكان  , اتمطع كده واحس انى مرتاح مرتاح يعنى .. واقول للبت ( مراته يعنى .. ) فيه فطار النهاردة ... ؟  تقولى اه
اقوم افطر والواد يروح المدرسة واقعد انا مع البت ساعة صبحية كده , واتغدى واتفرج عالتليفزيون .. وبليل التاكسى تحت البيت
انزل احط نفسى فيه انا والبت واروح ازور اخويا .. يوم تانى اقولها تعالى نزور امك ,  لا لا لا كانت عيشة باشوات يعنى
انا كمان حسيت بنفسى بصراحة .. وعرفت قيمة القعدة فى البيت .. لا .. ولاقيت نفسى نزلت اشتريت لى تارينجين ( 2 تريننج سوت ) وشبشب .. ااااااااااه .. ما انا قاعد فى البيت بقى وبقيت اهتم بنفسى . حكم انا برضك اموت فى الدلع والنزاهة والرحرحة
عكس الأول .. كنت بنزل 7 الصبح وارجع اخر النهار مهدود حيلى .. لا انا طايق البيت ولا الواد ولا مراتى , و أكلى كله فى الشارع  , وطول النهار بلفلف فى الشوارع والتراب والزحمة والقرف  , وطبعا مش بشوف حد من أهلى . لا اخ ولا اخت . اينعم كان بيدخلى اد  الــ 75 جنيه دول مرتين  ثلاثة ..  بس فى داهية قصاد الراحة اللى الواحد شافها الشهر ده
بس تقول ايه بقى .. !!! مفيش حاجة بتفضل على حالها !!
شوية شوية بقى الواد بقى يطنش الشغل .. بقى يكبر دماغه   ..  يكلمنى يقولى مش هنزل النهاردة , او يقولى معلش اصل امى تعبانة , اصلى هودى مراتى الدكتور , اصل مش عارف ايه .. والحجج بدأت تظهر بقى
وبقى مهمل فى العربية لا بيغسلها زى الاول ولا بيروشها ,, مرة واحدة حالو اتشقلب .. من غير احم ولا دستور
لا لا بقى زى الصنايعى اللى فى جيبه قرشين فــ بينام عليهم .. مش وش نعمة خالص
مش كده وبس ..... اسمع دى .. يجيى ياخد العربية .. ويركنها تحت بيتهم !!! شفت انتا دى قبل كده
او والله زى ما بكلمك .. بيركنها تحت بيتهم  وما يشتغلش ...  امه  أصلها  بتقبض المعاش وساعات تميل عليه بورقة بــ 200 كده كل كام يوم ..
او تديله فلوس الوردية وتقول له .. تعالى ودينى عند اختك .. يجيلى بليل يدينى الفلوس وابص عالعداد الاقى عامل 20 كيلو بس
اقوله انتا جبت البنديرة من مشوار واحد !!! .. يقولى لا . اصل النهاردة كنا معزومين عند اختى وامى هى اللى شالت اليوم ويوم تانى معزومين عند اخته التانية عشان ولدت
ومرة يقولى روحت عند حماتى .. ما اصل مراته هى راخرة  متوظفة وممكن تقبض لها مكافأة فينام عليها اسبوعين ما يشتغلش .
لا لا لا لا  بقى بيتدلع دلع مرق ملوش  لا  طعم  ولا ريحة ..
اصلك  انتا ما تعرفش  حكايته ..  ده واد جاى على ست بنات !! عارف يعنى ايه واد على ست بنات .....
وامه مش مخلياه محتاج , وكذلك مراته  بعد ما اتوظفت ..
وتشوفه كده تلاقيه ملزق شعره جل ,  وهو اصلا  تخين كده ومربرب فى نفسه  وعنده يجى 27 سنة .. لسه عيل يعنى ..  ومتجوز ما بقالهوش 8 شهور ,, تشوفه كده ما يدخلش دماغك ... كله خراعة وطرواة كده
وطبعا انتا عارف الواد المتربى وسط خلفة بنات بيطلع واد طرى  اد ايه ..
تحسه علق كده لما تشوفه .. لا .. علق ايه !!! .... هو خول بصراحة

طب والله والله والله ولا ليك عليا يمين ..... وعهد مين ده ؟؟؟  ومرة واحد يمد ايده ويقولى ..
 فانا اضطر امد ايدى واسلم عليه ..
- وعهد الله وعهد الله  والعشرة الطيبين دول ... والطريق اللى ماشين عليه ده ( مش لاقى اى معنى انه يحلف الحلفانات دى كلها وانا مليش عليه حلفان زى ما قال .. ده غير انى مش قادر افهم يعنى ايه حد يحلف بالطريق )
 البيه بياخد خميس وجمعة وسبت ....  أجازة  ولا اجدعها مستوظف
لا و ممكن كمان يتصل بيا يوم الاحد يقول لى انا حاسس ان اليوم النهاردة  ميت  مفهوش شغل كده .. فخليها بكرة بقى
- طب يا اسطى متشكرين ... نزلنى هنا و ماتنساش تاخد المفتاح من الواد ده 

عرض لـ كتاب الأخوان المسلمون وسنوات ما قبل الثورة

أنتهيت من قراءة كتاب الإخوان المسلمون وسنوات ما قبل الثورة .. فى صراعنا الحالى مع تلك الجماعة المغتصبة الخارجة عن اى توافق او عهد والتى لا ترى سوى اهدافها وتطلعاتها فقط بغض النظر عن اهداف الوطن او آلامه . لابد و أن ننفصل جزئياً عن الصراع اليومى ونحاول قراءة الجماعة من الداخل ونعرف تشريحها ونلمس توجهاتها وخلفياتها والمسكوت عنه فى داخل هذا التنظيم الهرمى المعقد ..
وكتاب الإخوان المسلمون وسنوات ما قبل الثورة يتناول تلك الفكرة .. الغوص فى أعماق الجماعة بعقل وقلم باحث جدير ومحترم فقدناه للاسف منذ عام ولم يشعر به احد فى غمرة الاحداث اليومية التى نمر بها .

نبذة عن المؤلف حسام تمام ( 1972 - 2011 )
من ابرز الخبراء العرب فى شئون الاسلام السياسى ومؤسس أول مرصد متخصص فى دراسة الحركات الاسلامية , عمل محاضراً فى جامعة زيورخ وساهم فى العديد من الاصدارات المتخصصة فى الشرق الاوسط بالتعاون مع عدد من الجهات البحثية الأوربية .

يتناول الكاتب عدة أطروحات مثل تراجع الجماعة عن تراثها المدنى والحضارى او بالاصح موجة الترييف التى حدثت فى الجماعة
وتأكل الأطروحة الأخوانية لمصحلة التيار السلفى المتشدد بما يسميه الكاتب موجة تسلف الجماعة ثم يستعرض مواقف الجماعة ازاء قضايا مثل الجهاد  

1 - الجماعة وفكرتها ..

يبدأ الكاتب فى تشريح فكرة الجماعة ويسهب فى الحديث عن هيكلها والفكرة التى قامت عليها ثم يوصف التيارات المختلفة داخل الجماعة وكيف يراها الفرد الأخوانى وماذا تمثل له .. فيقول
"  بإستثناء الأطروحة المركزية عن الإسلام الشامل , فثمة تعددية فكرية فيها داخل الجماعة التى تضم تيارات تبدأ من السلفية وتنتهى بالليبرالية المتدينة . لا تميل للحسم فى القضايا الفكرية إلا مضطرة .. لكى تظل الممثل الأول لفكرة الاسلام الشامل . هى إطار سياسى اكبر من حزب واصغر من دولة , خلقت مجتمعاً موازياً له شبكة علاقات ضخمة ... شكلت فضاء إجتماعياً موزاياً كبيراً يعيش فيه المرء من الميلاد للممات .. فـنجد " الأخ " ينتظم فى اسرة تجمعه بأقرانه وتربطه بصلات تنظيمية وإجتماعية , تملأ حياته بحيث لا يستطيع ان يفلت منها أو يفكر فى الافلات , فهو يعيش ويتعلم ويصادق ويتزوج ويجد فرصة عمل وينشط سياسياً ودعوياً فى فضاء إخوانى كامل ولا يتبقى لهم سوى إطلالة على المجتمع من ثقب التنظيم ولا يخرج الفرد من هذا المجتمع المغلق إلا بقطيعة وصدام عنيف .. فمن يختار الإنفصال فهو يرفض بالأساس مجتمع نشأ وتربى به " 
ويكمل ايضاً .. 
"  يعد الانضمام للأخوان احد آليات الصعود الأجتماعى فى الطبقات الدنيا .. إذ تتيح الجماعة لأعضاءها فرصة التحقق من خلال شبكة إجتماعية كبيرة وتساعد هذه الشبكة فى تأمين الحد الادنى من الضمان الاجتماعى لأعضاءها " 


2  -  ترييف الجماعة 

وينتقل الكاتب بعد ذلك لفكرة الترييف التى طرأت على الجماعة بعد التاسيس الثانى لها فى أوائل السبعينيات بعد حالة الأنحسار التى حدثت لها فى المدن والحضر .. 
"  اخذت فكرة التنظيم فى الضعف و التراجع فى اوساط الشباب فى المدن خاصة ان الجماعة شهدت فى العقدين الأخيرين زيادة مفرطة فى مساحة التنظيم والعسكرة على حساب الدعوة المفتوحة القادرة على استيعاب كل المقتنعين بالفكرة .  و لعب الريف دوراً بارزاً فى مد الحركة الأخوانية بمخزون اجتماعى , وغالباً يظل هؤلاء أقرب إلى التكوين الريفى فى ثقافتهم و رؤيتهم للعمل العام فالتكوين العلمى والعمل الجامعى يظل لديهم أقرب لوظيفة او منصب . وكثير منهم بالفعل متميز فى الجانب العلمى غير انه منفصل تماماً عن العالم فى تكوينه الثقافى .. لدى جماعة الأخوان نحو ثلاثة آلاف عضو فى هيئات التدريس بالجامعات ولكن معظمهم من دون وعى نقدى وهم فى ذلك جزء من المناخ العام فى مصر  , شهدت السنوات الأخيرة سيادة ثقافة ريفية تخالف ما نشأت عليه الجماعة الحضرية .. ثقافة تتوسل بالقيم الأبوية حيث الطاعة المطلقة والإذعان للمسئول التنظيمى و انتشار سلوكيات مثل تقبيل الايدى والروؤس .

3 - تسلف الجماعة .. 
حدث تحول فقهى وسلوكى شديد الوضوح فى عقل الجمعى للجماعة وصعود بالغ للتيار السلفى على حساب فكرة الاسلام الوسطى التى ميزت الجماعة  ويوضح  تمام هذا الصعود .. 
"  ظهرت مسائل فقهية معتادة فى الفكر السلفى الوهابى مثل العلاقة بين الرجل والمرأة والموقف من الموسيقى والفنون بشكل عام وظهرت النقاشات والخلافات بين شباب الجماعات و بين بعض شيوخ الازهر وصلت لدرجة اتهامهم بالممالأة وتغلبت روح التشدد فى مواجهة الروح السائدة .. " 
 كما انتشر الحديث لأول مرة عن زى المرأة واخذت مسألة الحجاب تأخذ وزناً مختلفاًً داخل اورقة الجماعة ونظرة لقسم الاخوات فى الجماعة فى بدايات إنشاءها ونظرة أخرى للقسم حالياً تبين بجلاء كيف اختلف زى النساء وشكل الحجاب داخل الجماعة وكيف اثرت الافكار السلفية وانتشرت بشدة داخل هذا التنظيم الذى طالما اكد على وسطيته .. 
وكانت الأجيال التى دخلت الجماعة فى السبعينيات والتى خرجت من رحم الجماعة الاسلامية فى الجامعات دورها الكبير فى تغيير شكل الجماعة وافسح الطريق لأنتشار المد السلفى داخل التنظيم بشدة .. ويذكر فى هذا الصدد عبد المنعم ابو الفتوح فى كتابه
" شاهد على تاريخ الحركة الاسلامية " ان شباب الجماعة الاسلامية كانوا يأخذون على شيوخ الأخوان تهاونهم فى مسائل اللحية والجلباب ولشدة التطرف الذى كان مسيطراً على شباب الجماعة الاسلامية وقتها اضطر شيوخ الأخوان لمجاراتهم بعض الشىء كى يكتسبوا ثقتهم ويستطيعوا إقناعهم بدخول جماعة الأخوان .
ويفسر تمام ذلك التوجه السلفى الجديد بأمر له مدلول شديد الأهمية .. فيقول 
"  كان الدعم الذى تقدمه الهيئات الدينية السعودية الرسمية والغير رسمية للأسلاميين احد قنوات العلاقة السعودية الاخوانية وتمثل ذلك فى الرحلات الجماعية الميسرة للحج والعمرة التى كانت تعود وخلفها ارطال من الكتب الدينية والوهابية التى تحمل شعار يهدى ولا يباع " 

كما يبين اثر ذلك التوجه على فقه الإخوان وخطابهم .. 
"  فى مشروع الأخوان لدستور إسلامى عام 1953 كان من السهل حسم مسألة المواطنة لتصبح بعد اكثر من نصف قرن من التطورات المتلاحقة من اكثر القضايا التى حدثت فيها تراجعاً فى مشروعهم لعام 2007 ." 


3 - فكرة الجهاد عند الأخوان ..  يقول تمام 

الجهاد فكرة مركزية فى منهج الاسلام السياسى , بحيث لا يمكن تجاوزها بمبدأ المراجعة الفكرية . ولكن معركة الجهاد لدى الأخوان تبدو رهناً بدرجة الحضور أو الابتعاد عن السياسة . لا يرفض الاخوان فكرة الجهاد المسلح فى مواجهة المحتل او الدولة الغير اسلامية ولكنهم لا يتورطوا بأنفسهم فى اى مواجهات ويفضلوا ان ينوب عنهم الاخرون 
وقرر الاخوان ان الاولوية لبناء التنظيم مع الاستفادة الدعائية من الجهاد. 
وفيما يلى عدة أمثلة من عدة دول يوضح كيف تفاعل الأخوان مع فكرة الجهاد 

فى مصر .. 
بعد إغتيال السادات على يد تنظيم الجهاد والجماعة الاسلامية سارع الاخوان بتحديد موقفهم ودشن الاخوان حضورهم الجديد على اساس انه تيار الاعتدال وكان قرارهم بالتحالف مع حزب الوفد الليبرالى فى انتخابات 84 , وصارت الجماعة تتورط بالتدريج فى منظومة يصعب ان تنتج عنفاً حتى لو حمل من يدخلها جينات كامنة لهذا العنف تاسيساً على كتب وادبيات تجاوزتها الجماعة ولم تملك جرأة نقدها ومراجعتها .

فى الجزائر 
التحقت الجماعة بالسلطة فى مواجهة مشروع جبهة الانقاذ الاسلامى وقبلت اللعب دور الاسناد الاسلامى للعسكر فى حملتهم ضد التمرد الاسلامى وقبل محفوظ نحناح زعيم جماعة الاخوان فى الجزائر المشاركة فى الانتخابات الرئاسية الصورية .

فى العراق 
لم يتردد الاخوان فى الألتحاق بالعملية السياسية تحت قيادة الحكم الانتقالى برعاية بول بريمر مندوب الاحتلال وفضلوا مقاومة الاحتلال بالعودة إلى التوبة كما سجلت لوحات إعلانية إمتلات بها مساجد العراق ( قاوموا الاحتلال بالتوبة فى رمضان )

فى سوريا .. اختلفت القصة 
كان أخوان سوريا الاستثناء .. حيث تمردوا عسكرياً على السلطة ونظام الاسد وانتهت المواجهات بمجزرة عكسرية فى حماة راح ضحيتها الألاف .
انتهى عرض الكتاب وبقى تعليق
الكتاب بالفعل رائع جداً ويختلف كثيراً عن فكرة عضو الاخوان المنشق الذى يصدر كتاباً يقطع فيه اوصال الجماعة وتفوح من كتابته رائحة الانتقام ويشوب حديثه كثير من عدم الموضوعية
اما هذا الكتاب فيعرض بشكل علمى وموثق بشدة التطورات والتحولات التى طرأت على جماعة الاخوان بعد تأسيسها الثانى


مصطفى شوربجى
10/3/2013