سـيـجـارة كـلـيـوبـاتـرا ...

أنا برضه مش بحب الولاعة ..
بتخلى الدنيا سهلة كده , مجرد تكة بسيطة تلاقى السيجارة ولعت , ده كمان طلعولنا الولاعة السخان عشان يوفروا عليك تعبك لما بتحاول تدارى على نارك من الهوا .
هما عاوزين كل حاجة سهلة , من غير تعب , تتعمل بسرعة .
وانا مش بحب كده
كمان مش بحب السجاير الأجنبى تلاقى السيجارة كده متظبطة ومتساوية والمكنة مطلعة التبغ مسطرة .. مش محتاج اى حاجة . وده برضه عشان متأخدش وقت فى تظبيطها .
وهووب تحط السيجارة فى بقك وبسرعة ولاعتك السخان تشعلها , وبسرعة تشربها , وبسرعة تشرب السيجارة اللى بعدها , كله بسرعة وبسهولة ..
وانا مش بحب كده .
انا اصلا مش بحب السجاير .. انا بحب الحالة .
وعشان كده سجايرى كليوباترا .. وعادية كمان مش بوكس
علبتها صعبة الفتح ولازم تفضل تسيح فى البلاستكاية اللى مغلفة العلبة بالكبريت , وبعد كده تفتح جزء صغير وتفضل تخبط كده بصباعك على العلبة من فوق عشان باقى السجاير ينتخبولك سيجارة فتطلع السيجارة واحدة واحدة وتستلمها وتبدأ تفرك فيها من فوق ومن تحت عشان التبغ يتوزع صح , وبعد كده توقفها على ضهرها وتبدأ تخبط بيها على ضهر ايدك , عشان التبغ يترص مظبوط , وفين وفين لما لما تحطها على طرف شفايفك وتطلع كبريتك الأمشاط مش العلبة وتنزع مشط وتحطه ما بين سبابتك والوسطى وتبدأ تشط مرة و التانية والتالتة ..
ثم المشط ينوّر , ثم تقربه من سيجارتك
ثم التبغ يشمّه , ثم تسمع صوت التبغ وهو بيشتعل
ثم تاخد أول نفس ويبقى طويييل حبتين
ثم تستنى حبة , ثم تنفثه براااحة , ثم تتكيف من السيجارة
ثم تعلن إنك بتعشق الحالة مش السيجارة .

الـعـلـمـانـيــة .. جميع الحقوق محفوظة

طيــب .. واحـدة واحـدة .. وبهــداوة كده 

ربــنـــا عزّ وجلّ خلق الأرض .. 
وخلق عليها المسلمين والمسيحين واليهود والبهائين والمجوس والبوذيين 

وكمان خلق اللادينـيـن ... 
اللى هما معترفين ان فى خالق لهذا الكون , ولكنهم غير مؤمنين بالأطــر الدينية الموجودة 

مش بس كده ربنا خلق كمان الملحدين .. !!!
اللى مش معترفين اصلاً بوجوده سبحانه.. تعالى وتنزه وتناهى 
واكيد اكيد لما ربنا خلقهم .. كان يعلم انهم هيصبحوا كما صبحوا 

بس الفكرة بقى ... 
انه اولاً .. 
تركـهــم مـوجـوديـن معانا لغاية النهاردة .. تخيل دى 
تخيل إنــه لم يهلكهم على سبيل المثال 

ثانياً بقى وده الأهم ... 
خلـقـهـم على هيـئـة بـشـر .. وهبهم عيـون وألـسـن وآذان و عـقـول وقـلــوب 
زيـهـم زى المـؤمـنيـن بالـظـبط 
لم يخلقهم علـى هيئـــة قــــرود مثـــلاً للتفرقة بينهم وبين المؤمنين 
خلقهم متســـاوون تماماً تماماً كأسنان المشط , منحهم حقوقهم كاملة ككل البشر 
لا فرق إطلاقاً إطلاقاً .. "واخد بالك انتا من إطلاقاً دى " 
بينهم وبين اى مؤمن .. و أعتقد انى دى سنة ربانية فى خلقه 

الأكـثـر من ذلك .. 
عندما امتكلوا أسباب القوة نـصـرهم علـى المؤمنـيـن فى الحـيـاة الدنـيـا . 

لسه مفهمتش انا عاوز اقولك ايييييييييه ؟؟؟؟ 
انا قلت الكلام ده كله .. عشان اقولك حاجة بسيطة 
بأى منطق يا بنى ادم انتا عاوز انتا تخالف السنة الكونية دى 
ومين اعطاك الحق أصلاً إنك تفرق بين بنى ادم وبنى ادم على اساس عقيدته .
وتمنع عن بنى ادم حق .. وتمنح غيره نفس هذا الحق .. 
لمجرد انه مش مؤمن ,, أو مؤمن بعقيدة تختلف عن عقيدتك 

كلمة أخيرة بقى ... 
العلمانية .. هى الجزء اللى انتى قرأته فوق ده .. 
تصدق انتا المعلومة دى :) اه والله هى دى العلمانية 
لو مش دى العلمانية ,,, تبقى العلمانية ايه من وجهة نظرك

ونهاية .. فإن الله تعالى أعلى و أعلم ..
وإن كنت قد أصبت فيما سعيت إليه , فإننى أسجد لله حمداً وشكراً
وإن كنت قد أخطأت .. فإننى أسجد له سبحانه , ملتمساً العفو و المغفرة

سواق تاكسى أبيض ..

فضلت واقف شوية عشان أختار عربية تكون نضيفة كده ومتروقة .. لغاية ماجات الفيرنا النضيفة
- العجوزة يا أسطى .. ؟
- تعالى يا باشا ..
- تسلم يا عمنا
اول ما تشوفه كده تحسه من منطقة شعبية بس أصيلة يعنى من عابدين او السيدة زينب  او شبرا كده يعنى , فى الاربعينات تقريباً وبيشرب سجائر مارلبورو أحمر , مش حاطط مصحف على تابلوه العربية , بس  مؤشر الراديو كان على القرآن الكريم , تحس من شكله وطريقة تعامله مع العربية انه صاحبها مش شغال عليها , وبسرعة سألنى ..
- فين فى العجوزة يا باشا ..
فين فى العجوزة .. فين فى العجوزة .. ثوانى هقولك
- لا براحتك وعلى مهلك .. وأمرنى وانا تحت أمرك
- شوف هو بالظبط عند اخر سور مستشفى العجوزة .. عـنــ ولم أكمل حتى رد بسرعة
- عند شارع الفالوجا ..
- الله ينور عليك ...
سكتت شوية وانا حاسس انه عاوز يقول حاجة ... فقررت انى انتبه عشان اشوف هيقول ايه , هيتكلم فى السياسة ولا فى حالة الجو  ولا فى الكورة , مع مرسى ولا ضده , بيأيد الأخوان ولا نفسه يغوروا فى داهية والجيش يمسك البلد .
بس اللى حصل انه خالف كل توقعاتى ..
- تصدق بالله يا باشا البنى ادم ده عدو نفسه ..
- لا إلا اله الله .. ليه بس بتقول كده
-يابشا  العربية تكون بتاعتك , وانتا مالك أمرك وفجأة تتجنن فى عقلك وتروح تسملها لواحد يشتغل عليها وبعد كده يذل اللى خلفوك . انا بقالى 20 سنة شغال سواق تاكسى لغاية ما واحد حبيبى جه كلمنى على شاب ظروفه صعبة ولسه متجوز .. وقالى اسلمه العربية يشتغل عليها .. فى الاول اعترضت .. بس هو فضل يقنع فيا وقالى  انى هكون باشا ..
وراح قايلى ده الواد هيجى ياخد العربية منك  ويجيبهالك  اخر النهار ومعاها وردية 75 جنيه ,  وكمان متفولة بنزين .... وحش ؟؟ لامؤاخذة يا باشا كلامه لعب بدماغى حبتين ... وروحت  قلته لا ....  مش وحش
بينى وبينك انا قلت اجرب ..
 وفعلاً سلمت العربية للواد , وهو بأمانة الله وعشان الواحد يكون صريح مع  نفسه .. كان ماشى زى الأكس ( كلمة الأكس اختصار لكلمة اكسبريس ومقصود بيها قطار الاكسبريس الذى لا يتوقف إلا فى محطة الوصول )
كان بيغسل العربية كل يوم ويروشها ويحط فيها فواحات ريحتها حلوة ,  وكان يجيلى فى اخر اليوم ومعاه الــ 75 جنيه ويروح سايب لى  المفتاح , حاجة كده زى الجلاش .. وفضلت عالحال ده شهر ... 30 يوم بالتمام والكمال
مكدبش عليك .. انا كمان فى الشهر ده حسيت بحاجة مختلفة , حسيت انى بقيت واحد تانى  .. اصحى من النوم براحتى , جسمى مش هلكان  , اتمطع كده واحس انى مرتاح مرتاح يعنى .. واقول للبت ( مراته يعنى .. ) فيه فطار النهاردة ... ؟  تقولى اه
اقوم افطر والواد يروح المدرسة واقعد انا مع البت ساعة صبحية كده , واتغدى واتفرج عالتليفزيون .. وبليل التاكسى تحت البيت
انزل احط نفسى فيه انا والبت واروح ازور اخويا .. يوم تانى اقولها تعالى نزور امك ,  لا لا لا كانت عيشة باشوات يعنى
انا كمان حسيت بنفسى بصراحة .. وعرفت قيمة القعدة فى البيت .. لا .. ولاقيت نفسى نزلت اشتريت لى تارينجين ( 2 تريننج سوت ) وشبشب .. ااااااااااه .. ما انا قاعد فى البيت بقى وبقيت اهتم بنفسى . حكم انا برضك اموت فى الدلع والنزاهة والرحرحة
عكس الأول .. كنت بنزل 7 الصبح وارجع اخر النهار مهدود حيلى .. لا انا طايق البيت ولا الواد ولا مراتى , و أكلى كله فى الشارع  , وطول النهار بلفلف فى الشوارع والتراب والزحمة والقرف  , وطبعا مش بشوف حد من أهلى . لا اخ ولا اخت . اينعم كان بيدخلى اد  الــ 75 جنيه دول مرتين  ثلاثة ..  بس فى داهية قصاد الراحة اللى الواحد شافها الشهر ده
بس تقول ايه بقى .. !!! مفيش حاجة بتفضل على حالها !!
شوية شوية بقى الواد بقى يطنش الشغل .. بقى يكبر دماغه   ..  يكلمنى يقولى مش هنزل النهاردة , او يقولى معلش اصل امى تعبانة , اصلى هودى مراتى الدكتور , اصل مش عارف ايه .. والحجج بدأت تظهر بقى
وبقى مهمل فى العربية لا بيغسلها زى الاول ولا بيروشها ,, مرة واحدة حالو اتشقلب .. من غير احم ولا دستور
لا لا بقى زى الصنايعى اللى فى جيبه قرشين فــ بينام عليهم .. مش وش نعمة خالص
مش كده وبس ..... اسمع دى .. يجيى ياخد العربية .. ويركنها تحت بيتهم !!! شفت انتا دى قبل كده
او والله زى ما بكلمك .. بيركنها تحت بيتهم  وما يشتغلش ...  امه  أصلها  بتقبض المعاش وساعات تميل عليه بورقة بــ 200 كده كل كام يوم ..
او تديله فلوس الوردية وتقول له .. تعالى ودينى عند اختك .. يجيلى بليل يدينى الفلوس وابص عالعداد الاقى عامل 20 كيلو بس
اقوله انتا جبت البنديرة من مشوار واحد !!! .. يقولى لا . اصل النهاردة كنا معزومين عند اختى وامى هى اللى شالت اليوم ويوم تانى معزومين عند اخته التانية عشان ولدت
ومرة يقولى روحت عند حماتى .. ما اصل مراته هى راخرة  متوظفة وممكن تقبض لها مكافأة فينام عليها اسبوعين ما يشتغلش .
لا لا لا لا  بقى بيتدلع دلع مرق ملوش  لا  طعم  ولا ريحة ..
اصلك  انتا ما تعرفش  حكايته ..  ده واد جاى على ست بنات !! عارف يعنى ايه واد على ست بنات .....
وامه مش مخلياه محتاج , وكذلك مراته  بعد ما اتوظفت ..
وتشوفه كده تلاقيه ملزق شعره جل ,  وهو اصلا  تخين كده ومربرب فى نفسه  وعنده يجى 27 سنة .. لسه عيل يعنى ..  ومتجوز ما بقالهوش 8 شهور ,, تشوفه كده ما يدخلش دماغك ... كله خراعة وطرواة كده
وطبعا انتا عارف الواد المتربى وسط خلفة بنات بيطلع واد طرى  اد ايه ..
تحسه علق كده لما تشوفه .. لا .. علق ايه !!! .... هو خول بصراحة

طب والله والله والله ولا ليك عليا يمين ..... وعهد مين ده ؟؟؟  ومرة واحد يمد ايده ويقولى ..
 فانا اضطر امد ايدى واسلم عليه ..
- وعهد الله وعهد الله  والعشرة الطيبين دول ... والطريق اللى ماشين عليه ده ( مش لاقى اى معنى انه يحلف الحلفانات دى كلها وانا مليش عليه حلفان زى ما قال .. ده غير انى مش قادر افهم يعنى ايه حد يحلف بالطريق )
 البيه بياخد خميس وجمعة وسبت ....  أجازة  ولا اجدعها مستوظف
لا و ممكن كمان يتصل بيا يوم الاحد يقول لى انا حاسس ان اليوم النهاردة  ميت  مفهوش شغل كده .. فخليها بكرة بقى
- طب يا اسطى متشكرين ... نزلنى هنا و ماتنساش تاخد المفتاح من الواد ده 

عرض لـ كتاب الأخوان المسلمون وسنوات ما قبل الثورة

أنتهيت من قراءة كتاب الإخوان المسلمون وسنوات ما قبل الثورة .. فى صراعنا الحالى مع تلك الجماعة المغتصبة الخارجة عن اى توافق او عهد والتى لا ترى سوى اهدافها وتطلعاتها فقط بغض النظر عن اهداف الوطن او آلامه . لابد و أن ننفصل جزئياً عن الصراع اليومى ونحاول قراءة الجماعة من الداخل ونعرف تشريحها ونلمس توجهاتها وخلفياتها والمسكوت عنه فى داخل هذا التنظيم الهرمى المعقد ..
وكتاب الإخوان المسلمون وسنوات ما قبل الثورة يتناول تلك الفكرة .. الغوص فى أعماق الجماعة بعقل وقلم باحث جدير ومحترم فقدناه للاسف منذ عام ولم يشعر به احد فى غمرة الاحداث اليومية التى نمر بها .

نبذة عن المؤلف حسام تمام ( 1972 - 2011 )
من ابرز الخبراء العرب فى شئون الاسلام السياسى ومؤسس أول مرصد متخصص فى دراسة الحركات الاسلامية , عمل محاضراً فى جامعة زيورخ وساهم فى العديد من الاصدارات المتخصصة فى الشرق الاوسط بالتعاون مع عدد من الجهات البحثية الأوربية .

يتناول الكاتب عدة أطروحات مثل تراجع الجماعة عن تراثها المدنى والحضارى او بالاصح موجة الترييف التى حدثت فى الجماعة
وتأكل الأطروحة الأخوانية لمصحلة التيار السلفى المتشدد بما يسميه الكاتب موجة تسلف الجماعة ثم يستعرض مواقف الجماعة ازاء قضايا مثل الجهاد  

1 - الجماعة وفكرتها ..

يبدأ الكاتب فى تشريح فكرة الجماعة ويسهب فى الحديث عن هيكلها والفكرة التى قامت عليها ثم يوصف التيارات المختلفة داخل الجماعة وكيف يراها الفرد الأخوانى وماذا تمثل له .. فيقول
"  بإستثناء الأطروحة المركزية عن الإسلام الشامل , فثمة تعددية فكرية فيها داخل الجماعة التى تضم تيارات تبدأ من السلفية وتنتهى بالليبرالية المتدينة . لا تميل للحسم فى القضايا الفكرية إلا مضطرة .. لكى تظل الممثل الأول لفكرة الاسلام الشامل . هى إطار سياسى اكبر من حزب واصغر من دولة , خلقت مجتمعاً موازياً له شبكة علاقات ضخمة ... شكلت فضاء إجتماعياً موزاياً كبيراً يعيش فيه المرء من الميلاد للممات .. فـنجد " الأخ " ينتظم فى اسرة تجمعه بأقرانه وتربطه بصلات تنظيمية وإجتماعية , تملأ حياته بحيث لا يستطيع ان يفلت منها أو يفكر فى الافلات , فهو يعيش ويتعلم ويصادق ويتزوج ويجد فرصة عمل وينشط سياسياً ودعوياً فى فضاء إخوانى كامل ولا يتبقى لهم سوى إطلالة على المجتمع من ثقب التنظيم ولا يخرج الفرد من هذا المجتمع المغلق إلا بقطيعة وصدام عنيف .. فمن يختار الإنفصال فهو يرفض بالأساس مجتمع نشأ وتربى به " 
ويكمل ايضاً .. 
"  يعد الانضمام للأخوان احد آليات الصعود الأجتماعى فى الطبقات الدنيا .. إذ تتيح الجماعة لأعضاءها فرصة التحقق من خلال شبكة إجتماعية كبيرة وتساعد هذه الشبكة فى تأمين الحد الادنى من الضمان الاجتماعى لأعضاءها " 


2  -  ترييف الجماعة 

وينتقل الكاتب بعد ذلك لفكرة الترييف التى طرأت على الجماعة بعد التاسيس الثانى لها فى أوائل السبعينيات بعد حالة الأنحسار التى حدثت لها فى المدن والحضر .. 
"  اخذت فكرة التنظيم فى الضعف و التراجع فى اوساط الشباب فى المدن خاصة ان الجماعة شهدت فى العقدين الأخيرين زيادة مفرطة فى مساحة التنظيم والعسكرة على حساب الدعوة المفتوحة القادرة على استيعاب كل المقتنعين بالفكرة .  و لعب الريف دوراً بارزاً فى مد الحركة الأخوانية بمخزون اجتماعى , وغالباً يظل هؤلاء أقرب إلى التكوين الريفى فى ثقافتهم و رؤيتهم للعمل العام فالتكوين العلمى والعمل الجامعى يظل لديهم أقرب لوظيفة او منصب . وكثير منهم بالفعل متميز فى الجانب العلمى غير انه منفصل تماماً عن العالم فى تكوينه الثقافى .. لدى جماعة الأخوان نحو ثلاثة آلاف عضو فى هيئات التدريس بالجامعات ولكن معظمهم من دون وعى نقدى وهم فى ذلك جزء من المناخ العام فى مصر  , شهدت السنوات الأخيرة سيادة ثقافة ريفية تخالف ما نشأت عليه الجماعة الحضرية .. ثقافة تتوسل بالقيم الأبوية حيث الطاعة المطلقة والإذعان للمسئول التنظيمى و انتشار سلوكيات مثل تقبيل الايدى والروؤس .

3 - تسلف الجماعة .. 
حدث تحول فقهى وسلوكى شديد الوضوح فى عقل الجمعى للجماعة وصعود بالغ للتيار السلفى على حساب فكرة الاسلام الوسطى التى ميزت الجماعة  ويوضح  تمام هذا الصعود .. 
"  ظهرت مسائل فقهية معتادة فى الفكر السلفى الوهابى مثل العلاقة بين الرجل والمرأة والموقف من الموسيقى والفنون بشكل عام وظهرت النقاشات والخلافات بين شباب الجماعات و بين بعض شيوخ الازهر وصلت لدرجة اتهامهم بالممالأة وتغلبت روح التشدد فى مواجهة الروح السائدة .. " 
 كما انتشر الحديث لأول مرة عن زى المرأة واخذت مسألة الحجاب تأخذ وزناً مختلفاًً داخل اورقة الجماعة ونظرة لقسم الاخوات فى الجماعة فى بدايات إنشاءها ونظرة أخرى للقسم حالياً تبين بجلاء كيف اختلف زى النساء وشكل الحجاب داخل الجماعة وكيف اثرت الافكار السلفية وانتشرت بشدة داخل هذا التنظيم الذى طالما اكد على وسطيته .. 
وكانت الأجيال التى دخلت الجماعة فى السبعينيات والتى خرجت من رحم الجماعة الاسلامية فى الجامعات دورها الكبير فى تغيير شكل الجماعة وافسح الطريق لأنتشار المد السلفى داخل التنظيم بشدة .. ويذكر فى هذا الصدد عبد المنعم ابو الفتوح فى كتابه
" شاهد على تاريخ الحركة الاسلامية " ان شباب الجماعة الاسلامية كانوا يأخذون على شيوخ الأخوان تهاونهم فى مسائل اللحية والجلباب ولشدة التطرف الذى كان مسيطراً على شباب الجماعة الاسلامية وقتها اضطر شيوخ الأخوان لمجاراتهم بعض الشىء كى يكتسبوا ثقتهم ويستطيعوا إقناعهم بدخول جماعة الأخوان .
ويفسر تمام ذلك التوجه السلفى الجديد بأمر له مدلول شديد الأهمية .. فيقول 
"  كان الدعم الذى تقدمه الهيئات الدينية السعودية الرسمية والغير رسمية للأسلاميين احد قنوات العلاقة السعودية الاخوانية وتمثل ذلك فى الرحلات الجماعية الميسرة للحج والعمرة التى كانت تعود وخلفها ارطال من الكتب الدينية والوهابية التى تحمل شعار يهدى ولا يباع " 

كما يبين اثر ذلك التوجه على فقه الإخوان وخطابهم .. 
"  فى مشروع الأخوان لدستور إسلامى عام 1953 كان من السهل حسم مسألة المواطنة لتصبح بعد اكثر من نصف قرن من التطورات المتلاحقة من اكثر القضايا التى حدثت فيها تراجعاً فى مشروعهم لعام 2007 ." 


3 - فكرة الجهاد عند الأخوان ..  يقول تمام 

الجهاد فكرة مركزية فى منهج الاسلام السياسى , بحيث لا يمكن تجاوزها بمبدأ المراجعة الفكرية . ولكن معركة الجهاد لدى الأخوان تبدو رهناً بدرجة الحضور أو الابتعاد عن السياسة . لا يرفض الاخوان فكرة الجهاد المسلح فى مواجهة المحتل او الدولة الغير اسلامية ولكنهم لا يتورطوا بأنفسهم فى اى مواجهات ويفضلوا ان ينوب عنهم الاخرون 
وقرر الاخوان ان الاولوية لبناء التنظيم مع الاستفادة الدعائية من الجهاد. 
وفيما يلى عدة أمثلة من عدة دول يوضح كيف تفاعل الأخوان مع فكرة الجهاد 

فى مصر .. 
بعد إغتيال السادات على يد تنظيم الجهاد والجماعة الاسلامية سارع الاخوان بتحديد موقفهم ودشن الاخوان حضورهم الجديد على اساس انه تيار الاعتدال وكان قرارهم بالتحالف مع حزب الوفد الليبرالى فى انتخابات 84 , وصارت الجماعة تتورط بالتدريج فى منظومة يصعب ان تنتج عنفاً حتى لو حمل من يدخلها جينات كامنة لهذا العنف تاسيساً على كتب وادبيات تجاوزتها الجماعة ولم تملك جرأة نقدها ومراجعتها .

فى الجزائر 
التحقت الجماعة بالسلطة فى مواجهة مشروع جبهة الانقاذ الاسلامى وقبلت اللعب دور الاسناد الاسلامى للعسكر فى حملتهم ضد التمرد الاسلامى وقبل محفوظ نحناح زعيم جماعة الاخوان فى الجزائر المشاركة فى الانتخابات الرئاسية الصورية .

فى العراق 
لم يتردد الاخوان فى الألتحاق بالعملية السياسية تحت قيادة الحكم الانتقالى برعاية بول بريمر مندوب الاحتلال وفضلوا مقاومة الاحتلال بالعودة إلى التوبة كما سجلت لوحات إعلانية إمتلات بها مساجد العراق ( قاوموا الاحتلال بالتوبة فى رمضان )

فى سوريا .. اختلفت القصة 
كان أخوان سوريا الاستثناء .. حيث تمردوا عسكرياً على السلطة ونظام الاسد وانتهت المواجهات بمجزرة عكسرية فى حماة راح ضحيتها الألاف .
انتهى عرض الكتاب وبقى تعليق
الكتاب بالفعل رائع جداً ويختلف كثيراً عن فكرة عضو الاخوان المنشق الذى يصدر كتاباً يقطع فيه اوصال الجماعة وتفوح من كتابته رائحة الانتقام ويشوب حديثه كثير من عدم الموضوعية
اما هذا الكتاب فيعرض بشكل علمى وموثق بشدة التطورات والتحولات التى طرأت على جماعة الاخوان بعد تأسيسها الثانى


مصطفى شوربجى
10/3/2013

حــزب نــوبــى ... كــيــــــف ؟؟

فى صيف عام 2012  سعدت بشدة  أن جمعتنى مصادفة عزيزة مع الأستاذ فوزى جاير...
 وكانت لتسجيل فيلم وثائقى نوبى وكان هو حينها المتحدث الرئيسى فى هذا الفيلم الذى للاسف لم نستطع عرضه حتى الان لأسباب يطول شرحها .
 و عرفت حينها ان فوزى جاير تربطنى به زمالة حزبية حيث اكتشفنا يومها أننا سوياً ضمن الوكلاء المؤسسون لحزب الدستور والطريف ان كل منا كان يحمل عدد جريدة الشروق الذى حمل اسمائنا كوكلاء عن هذا الحزب وكان هو عن محافظة اسوان وانا عن محافظة الجيزة .
وأخيراً تلقيت منه مشكوراً دعوة عبر موقع الفيس بوك للأشتراك فى صفحة أسمها الحزب النوبى ..
و تلك الدعوة هى اساس لما ستقرأه لاحقاً ..


أعود لبداية تشكل وعيى السياسى ..  لفترة  تسبق الثورة بسنوات قليلة فأجد نفسى لأ اؤيد فكرة الحزب القائم على العرقية  , ولا أظنى اؤيدها حتى الأن .. لأسباب عديدة أهمها إقتناعى بمبداً رفض التمييز وكنت أقول كيف بمن احترق بنار التمييز أن يلجأ لمثل تلك الحلول  ... الحزب النوبى
فالمفترض ان الدولة والاحزاب والجامعات والمدارس والنوادى والهيئات وكل المؤسسات  عامة كانت او خاصة مفترض انه مجرّم التمييز فيها على أى أساس اللون او الجنس او العرق او العقيدة او او او
وبالتالى فالحزب النوبى مرفوض لأنه ميّز ضد كل ما هو غير نوبى والمبادىء لا تتجزأ تبعاً للهوى او مفترض أن يتم ذلك


ولكن ولأننا بشر .. ولأننا نبغى الكمال ولا نروده ...  وبالرغم من كل تلك القناعات ..
إلا أن الدعوة و صاحبها والنوبة .. أجبرتنى على الوقوف للتفكير مرة أخرى .فالنوبة عندما تأتى بجوار أى كلمة أخرى فهى تغيرها من النقيض للنقيض .
بمعنى اننى اكره التعصب .. ولكن لو ذكرت كلمة التعصب النوبى قد افكر فى امرى
واننى اكره الكشرى مثلاُ .. ولكن فى حالة وجود كشرى نوبى .. فقد يصبح افضل أكلاتى
واننى اكره العادات والتقاليد بشكل عام .. فقط اضف كلمة النوبية للجملة وتجدنى اشدهم حرصاً عليها

وبالتالى .. دفعتنى الدعوة للتفكير مرة أخرى لربما أجد مخرجاً لا يتصادم بشدة مع معتقداتى ..
وسأعرض فى 3 نقاط محددة ومبسطة رؤيتى للفكرة بشكل مبدئى ..

- الأسم ..
الاسم عامل كبير لنجاح اى فكرة جديدة .. واعتقد اننا بكلمة الحزب النوبى قد ضيقنا ما هو واسع بمعنى اننا قد وقعنا فى أول أخطاءنا القانونية عندما اطلقنا أسم تمييزى بشدة لهذا الكيان الوليد .. وبهذا نكون قد خالفنا قاعدة عدم التمييز على اساس العرق بشكل خارق وظاهر للكافة
فعلى الرغم من وجود نص يمنع قيام احزاب على اسس دينية فنجد انه لدينا احزاب الحرية والعدالة والنور والبناء والتنمية والوسط والأصالة ومصر القوية ولكنك لا تجد فيهم كلمة اسلامى رغم وضوح توجهاتها الاسلامية  بشدة . ولكن تماشياً مع القانون الذى يمنع قيام أحزاب على اسس تميزية تجد أن أسماء تلك الأحزاب عمومية تماماً وهذا ما يجعلنا نعيد التفكير فى الأسم مرة اخرى .. وليكن على سبيل المثال حزب مصر الافريقية  واقول على سبيل المثال لتوضيح الفكرة ليس أكثر .

- الخط العام للحزب ..
اعود مرة اخرى لحزب مصر الأفريقية وانا متعصب للفكرة لا للأسم فى حد ذاته .. فكرة مصر الافريقية .. فهذا الحزب الوليد يجب ان يؤسس لفكر مبتكر , شامل , جديد
يجب أن يضع استراتيجية فريدة غير مسبوقة فكراً او تنفيذاً
فيضم فى صفوفه كل مصرى يرى مصر فى ثوبها الافريقى وليس فى ثوب اخر كل من يولّى  وجهه شطر الجنوب , كل من اعطى ظهره للشمال والشرق والغرب
كل من يرى مصر  سوداء ..

 كل من يؤمن مثلا انه لايد أن ياتى يوم ومصر والسودان عادا كيان واحد ودولة واحدة تعتبر عروس وادى النيل , كل من يؤمن ان افريقية مصر هى الاصل وان النوبة هى الإثبات والدليل الشرعى الوحيد ان مصر افريقية .
هو حزب لكل المصريين المؤمنين بتلك المبادىء وانه لا تقدم ولا تطوير ولا حداثة ولا مستقبل بغير ان يعاد تعريف هذا الوطن طبقاً لجغرافيته وموقعه التاريخى , بغير ان ينفض عن جسده كل الغبار  وعن وجهه كل تلك التشوهات التى عبثت فى عصب وجوده و استهانت بقيمه وعاداته وتراثه  ,  حزب يتبنى إعادة  تعريف هوية الوطن  وشكلها ورائحتها وكينونتها


- الإتجاه السياسى والإقتصادى للحزب ..
حزب بدون برنامج سياسى وإقتصادى واضح ومحدد هو ليس حزب بل فى حقيقة الأمر هم أناس يملكوا من النوايا الطيبة الكثير ولكنهم اقرب للهزل منهم للجد وقتئذ .
فإمتلاك رؤية سياسية للحزب وضع برنامج إقتصادى هى بديهيات أى عمل حزبى
ولن اضع العقدة فى المنشار كما يقولوا واسال أسئلة تعجيزية من نوعية ماهو البرنامج  الإقتصادى للحزب الوليد .

 لانه وبصراحة شديدة أغلب الأحزاب القائمة لا تملك برنامج اقتصادى واضح ومحدد

ولكن يمكننا الأستعاضة عن ذلك بتبنى رؤية إقتصادية معينة كمثل الديمقراطية الإجتماعية على سبيل المثال فهى منهج سياسى واقتصادى وسطى ويسمى عالمياُ الطريق الثالث ويمثل البديل الأنجح بعد إنهيار فكرة الايدولوجيا فى كل العالم وهذا ما يفسر سقوط كل الاحزاب الراديكالية فى العالم الشيوعى منها والقومى واليمينى المتطرف مع الوضع فى الاعتبار شواذ القاعدة .
كما أننا نمتلك أمثلة ناجحة قدمت اروع النماذج لهذا المنهج الفكرى كالدول الأسكندنافية او ما يسمى فى الأدبيات السياسية بدولة الرفاه التى يقوم اساسها على فكرة إلتزام الدولة بتقديم خدمات معينة لا يجب ولا يصح ان ينفرد بتقديمها القطاع الخاص وتقدم الدولة هذه الخدمات على ارقى ما يكون وفى المقابل يتم فرض ضرائب مرتفعة على المواطنين تصل فى بعض الاحيان لــ 60 % فى دولة مثل الدانمارك .


ما طرح هو مجرد فتح لباب المناقشة فى سبل تهميد طريق لنجاح الفكرة  ... ولكن الموضوع من التعقيد ما يلزمه مقالات ومقالات ومقالات .... وإلى هنا كان ذلك ما خطر على بالى عندما وصلتى دعوة الأخ العزيز فوزى جاير .. مع تمنياتى للقائمين على هذه الفكرة الجهادية كل السداد  والتوفيق


مصطفى شوربجى
16/2/2013

من المعادى للتحرير ... قصة ميكروباص

- تحرير يا أسطى ..
- تحرير .. يا لورد .. اركب هنا جنبى
انا بكره مترو الأنفاق .. بحس انه مواصلة قمة فى النمطية والملل , مش بس كده .. فى مشكلة كمان اكبر من النمطية
كفاية  ان الناس  مقتحمة  خصوصيتك لما تلاقى نفسك محاط بالناس من جميع الاتجاهات . شخصياً بعتبر ان الدائرة الوهمية اللى قطرها متر وانا مركزها  بعتبرها حدودى وخطوطى الحمرا .. اى تعدى عليها فعلاً بحس انه اعتداء على خصوصيتى واقتحام لنفسى
فكرة انى اضطر اقف جنب حد بالشكل ده والمسافة القريبة اوى دى .. مزعجة جداً
عينك فى عين اللى جنبك مفيش سنتيمرات بينكم .. تدور برأسك يمين او شمال تلاقى روؤس لاصقة فيك وانفاس متداخلة وحاجة كده اخر قرف بجد ..
شخصياً بعتبر الميكروباص او اتوبيس هئية النقل العام الأحمر الجديد ( لو فاضى ) مواصلات مناسبة لحد ما وادمية بشكل معقول
على الاقل الناس بتبقى قاعدين وشوشهم للأمام كلهم وكل واحد سارح فى دنيته .. مش عينه سارحة فى شكل لبسك ومنظر شعرك
ركبت جنب سواق الميكروباص الشاب اللى لابس ترينينج سوت نايكى ومصفف شعره بشكل انيق ولغته مع الناس محترمة جداً
عينى من ساعة لما ركبت من كورنيش المعادى عند المدخل الأول منزلتش من على منظر نيل المعادى ..
لغاية ما وصلنا عند مستشفى المعادى ,, هتقولى عرفت منين انك وصلت لمستشفى المعادى وانتا عينك على الكورنيش ..
هقولك من مهبط الطائرات الهليوكوبتر اللى قصاد المستشفى واللى تم إستخدامه لمرة واحدة فقط  لنقل جثمان  الرئيس السادات  لمستشفى القوات المسلحة فى المعادى بعد  ما أتضرب  بالنار فى حادث المنصة .
عقلك هيكون مشغول بفكرة إغتيال الرئيس وخلفيات الحادثة لغاية ما تشوف على يمينك حروف كبيرة بارزة على واجهة عمارة فخمة جداً .... ابـــــو الـــفـــــتــــــوح ..
فتنسى السادات وتفتكر حسن ابو الفتوح اللى كان من القطط السمان فى عهد السبعينيات واللى اُثروا بشكل بشع من  قرارات الأنفتاح فى عهد السادات ..
كفاية بس تعرف ان السادات صنع فى يوم واحد 28 مليونير تقريباً لما وزع توكيلات الشركات الكبرى على بعض رجال الأعمال المرضى عنهم . وكان توكيل بى ام دبليو من نصيب حسن ابو الفتوح .. رجل الأعمال الزملكاوى الشهير اللى اتولى فى يوم من الأيام رئاسة نادى الزمالك .. واللى يقال إنه وعد فاروق جعفر ملك النص فى زمالك السبعينيات  بسيارة بى ام دبليو اخر موديل لو قدر يقنع  زملاؤه فى الفريق انهم يتهاونوا فى  ماتش كوتوكو الشهير  نكاية فى مجلس الإدارة وقتها وفعلاً حدثت  ما تسمى بفضحية كوماسى وهُـزم الزمالك 5 / 2 وتمت إقالة مجلس الأدارة واتى حسن ابو الفتوح على راس المجلس الجديد ..
ايييييييييييييييه كل ده ... ايه اللى جاب حسن الفتوح والزمالك للى انا بحكى فيه ده
ببساطة هو ده الميكروباص ...
طول ما انتا ماشى دماغك بتشتغل مجرد ما تشوف اسم شارع او يافطة شركة او بيت شخص
مش تقولى مترو الأنفاق ... يا راااااااااااجل يغور بريحته

فى محطة فم الخليج وعند اول شارع قصر العينى .. لمحته واقف , هيئة مرتبكة لحد ما , جسم سمين بس بتماسك وغلظة , وجه مستدير فى سن السبعين تقريباً وتبدو عليه مظاهر القوة والصحة .. عيون واسعة , حواجب كثيفة جداً يكسوها الشيب بقسوة , راس أصلع إلا من قليل من الشعر من خلف ومن الجوانب .. وجهه ضخم ولكن يوحى بالطيبة الشديدة .. يحمل شنطة سفر متوسطة الحجم
ما أن اقتربت العربة منه .. حتى اخد يلوح فى إضطراب .. تحرير ... تحرير ..
ايوة يا حج .. قلتها وفتحت الباب واتخذت مكانى فى الكرسى بينه وبين السائق ..


ناولنى الشنطة قائلاً : ..  ثوانى بس وهاخدها منك تانى لما اركب ..
- على مهلك يا حج هات الشنظة ..
مد يده وامسك باليد أعلى الباب وبذل جهد عظيماً فى رفع جسده من على الارض حتى كرسى الميكروباص .. واستقر أخيراً وتناول شنطته .

وبدأنا ..
- معهد السكر ده ناس محترمين جداً , ربنا يبارك لهم ... مرة روحت هناك كان عندى ازمة .. ماشاء الله عليهم اهتمام ايه ورعاية ايه
قعدت يومين وخرجت زى الفل ... ولغاية دلوقتى الحمد لله ماحصلتليش تانى .. ربنا يشفى كل مريض
- انا : الحمد لله .. ربنا يديك الصحة  .. رديت بأقتضاب وسكتت ..
من طباعى عدم تبادل الحديث مع غرباء

- الشنطة مضايقاك ؟؟؟ 

- لا يا حاج براحتك ... اقعد براحتك خالص

- معلش يا اسطى مش هاعرف اطلع لك الفلوس .. انا معاك لغاية الأخر ما تقلقش اول ما ننزل هدفعلك 

- الأسطى :  ولا يهمك يا حاج ... خلى عنك خالص

- المنطقة دى قديمة جداً على يمينك المنيرة وعلى شمالك جاردن سيتى ... كانت زمان كلها باشوات واكسلانسات دى .. ايام بقى  

قالها ولم ينظر إليه أحد .
بـــدا لنا أنه لا يتوقف عن الحديث , والتواصل معه  والرد عليه لن يكون حلاً مناسباً   .. فى تلك الحالة
 فقد تنزلق لمحادثة طويلة لا تنتهى , فأثرت السلامة وقررت السكوت تماماً ..
يدخل الميكروباص فى شارع جانبى من شوارع جاردن سيتى للهروب من شارع قصر العينى الذى تحول لجراج كبير بفعل الزحام الشديد
نمر امام قصر لأحد باشوات عصر ما قبل 52 ...

- الله ... شوف الجمال .. ياخى سبحان الله العمارات اللى اتبنت دلوقتى وقعت والحاجات دى عدى عليها اكتر من 100 سنة ولسه واقفة زى ماهى .. الناس زمان كان عندها ضمير .. ثم تنهيدة طويلة .

للحظة ,, شعرت بالتعاطف الشديد  معه ... روادنى إحساس انه شخص وحيد لا يجد من يتحدث إليه فيستغل فرصة ركوب اى مواصلة لتبادل الحديث مع من جاوره .. ربما كان أرمل توفيت زوجته وأنشغل اولاده فى حياتهم ويعانى من شعور الوحدة القاتل ..
ولفت نظرى انه حين يبدأ فى التحدث ينظر إلى فى عينى ولا يتكلم فى المطلق مثل كتيرين .. وهذا دليل على رغبته  وإهتمامه بــ خلق حالة ود وتواصل  مع من يتحدث إليه
شعرت بالحرج من نفسى جداً والاستياء فى نفس الوقت .. كيف كنت قاسى هكذا على شخص لا يريد فقط سوى ان يتحدث وان يجد من يسمعه ويرد عليه !!!
... وبدأت ابادله الابتسام ..
ويمر امام الميكروباص المتوقف عن السير بفعل الزحام , طفل يرتدى قميص لبنى اللون وبنطلون كحلى ويتحدث فى هاتفه المحمول ..
وطبعاً لايفوت مثل هذا المشهد على صاحبنا دون تعليق

- الموبايل ده من قيمة كام سنة كده كان الخط بتاعه يجى بتلاتلاف ولا اربعتلاف جنيه... كان بتاع رجال الأعمال بس دلوقتى يا باشمهندس تلاقيه فى ايد العيل فى الحضانة , الحضاااانة !! مش هاقولك المدرسة حتى .. 

- انا : اها . دى حاجة طبيعية دلوقتى يا عمنا
هو فعلاً لا يتوقف عن التعليق عن اى شىء يراه ... كل ما يخطر على باله شىء يتحدث عنه  ولا يتوقف عن الحديث
حتى لو لم يجد مستمع له .. او حتى لم يجد من يرد على كلامه .. هو يتكلم و يستمر فى كلامه مهما حدث .
فى اخر العربة رجل يتكلم بلهجة صعيدية ويبدوا انه يوصف عنوان عبر هاتفه لمتحدث على الطرف الأخر .

- اهو اتفضل يا عم ... عمال يزعق ويقولك ادخل يمين واطلع شمال .. الناس خلاص كلها مش طايقة بعضها .. يلا

- يا سلام لو الجو يمطر شوية عشان العفرة دى ... لو الدنيا مطرت الدنيا هتهدى شوية ده الواحد اتغسل تراب يا اخى

السائق مشاركاً للمرة الأولى : ما الدنيا بتمطر اهى يا حج انتا مش واخد بالك ولا اييييييه

- تهلل فرحاً كأنه طفل صغير : والله ... !!!!   بتمطر .... !!!!
ايوة كده .. اطلع بقى الطاقية بتاعتى .. انا اصلاً والله كنت حاسس , وقلت انها هتمطر وعشان كده قلت لازم اخد الطاقية معايا .. 

تعجبت لموقفه جداً  , فنحن داخل العربة والنوافذ كلها مغلقة ...  لمــاذا الــطــاقـــــــية ؟؟

- انا : طب استنى لما تنزل يا حاج ... هتلبسها جوة العربية ليه ؟ ... ايه لازمتها ؟

- هو بعصبية واضحة : وانا لسه هستنى لما انزل .. !!!
بقولك لازم البس الطاقية دلوقتى  انا كنت حاسس والله انها هتمطر وعشان كده اخدتها قبل ما انزل 

واعتدل فى جلسته وقام بفتح الشنطة واخذ فى البحث بهمة واضحة وسرعة غير مبررة  ..
حتى اخرج ايس كاب من الصوف اسود اللون  وتشعر من طريقة تناوله الحثيث للطاقية الصوفية كأنها شىء عزيز جداً عليه وكأنها قطعة ذهبية ثمينة  واهتم بأن يلبسها بشكل مضبوط  وظل يبحث على العلامة المرسومة عليها حتى يحدد الواجهة من الخلفيه ...
ربما كانت تلك الطاقية، ما حاولت به زوجته العجوز الراحلة أن تدفع عنه بها برد الشتاء، الذي قد يهزم بأقل مجهود جسده السمين الذي أعيا خلاياه السكر، ربما قررت دفع البرد عنه بشرائها من بضعة جنيهات مقتطعة من مصروف البيت، ربما أعطتها له وهي تقول "البسها واوعى تقلعها ف الهوا، اسمع كلامي والبسها علشان تدفي ودانك" وربما مازال في قلبه شئ من طاعة لكلام الراحلة، جعلته يبدو في حالة الإصرار الطفولي الغاضب تلك، ويأبى أن ينزل من الميكروباص لمطر الشتاء وهواءه الطلق إلا وهو مرتديها، وربما.. ربما اشتراها بنفسه ولنفسه بعد بحث بين باعة الأرصفة عليها، فالراحلة قد ماتت قبل أن تشتريها..
وربما و ربما و ربما .....
 وأخيراً وضعها على راسه وظل يوسد راسه من الخلف كثيراً ليضبط وضعها  بشكل اكثر دقة
ثم نظر إلى المرأة على يمينه ..  وتلفت يميناً ويساراً
بـــدا سعيد جداً .. بــــدا سعيداً جداً بصورته وهو يرتدى طاقيته التى أصر على أن يأخذها قبل نزوله من البيت

نص مشترك بين
صفاء سرور
مصطفى الشوربجى
شارع القصر العينى
فى  8/1/2013

أســـوان ... القبلة جهة الجنوب قليلاً

1- كــنــــوزنـــــا .. اجـــدع نــــاس

على طريق مصر اسوان الزراعى . نعبر مزلقان للسكك الحديدية وتعلن لافتة زرقاء عن نهاية الكاجوج أحد قرى الجنوب  وبداية قرية جديدة . تصطف على يسارك بيوت نظيفة متشابهة ذات دور واحد علىالأكثر تحمل كلها اللونين البيج والبنى كإشارة مميزة لبيوت نوبيو التهجير .. و على المدى تلمح  ثلاث سيدات يقفن قبالة أحد المنازل الذى تجلس صاحبته على المصطبة فى دعة ولامبالة تواصل حديثها مع ضيوفها  , المشهد ينم عن زيارة إنتهت توا , ولكن فى عادة فرعونية على الأغلب يستمر التسامر على باب المنزل , الذى انفتحت احدى ضلفتيه على صالة البيت التى ينبعث منها ضوء اللمبة النيون القوى فى ظلمة الليل  كأشفاً عن أثاث مرتب وأنيق  .. الزائرات يبلسن زى موحد عبارة عن ثوب أبيض رقيق ملفوف , يعلن عن نوبيتهن القحّ . والمهتم بالتاريخ النوبى القديم يرى المشهد بشكل أعمق قليلاً , حين تستدعى ذاكرته خلفيات هذا الثوب ويترائى امامه مشهد جحافل ود النجومى وهى تمارس مذابحها فى بلاد النوبة فى نهايات القرن التاسع عشر.
 أمتار قليلة وتتلقفنا لافتات أخرى تعلن عن قرية وراء قرية
ماريا .. مرواو. ..  جرف حسين . ويتوقف الميكروباص لينزل أحد ركابه , وتتاح لنا فرصة متابعة احدى القرى عن قرب  حيث زينات الاضواء بالوانها الزاهية معلنة عن ليلة فرح فى القرية ولا ينتهى المشهد حتى تلمح  صف من سيارات الدفع الرباعى مختلفة الاشكال والأحجام حاملة للوحات مرورية جمركية .. بطعم النفط .


2- الفوزة ...  

على نفس ذات الطريق السريع و عند قرية الفوزة مركز ادفو .. القرية التى يقيم بها بعض نوبيو تهجير عام 33  تتراص بعض المركبات الصينية الصغيرة المنتشرة فى مصر والتى لم تنجو منها اسوان ومراكزها , ترى ذلك الشاب الصعيدى ذو الجلباب الداكن والقامة النحيلة الطويلة ينتظر زبون لا يأتى بسهولة فى ذلك الوقت من المساء ,  فجلس داخل مركبته ينفث دخان سيجارته الملفوفة وينفق  دقائق إنتظاره فى الإستماع للبروفسير السودانى  عبد الكريم الكابلى وهو يشدو بــــ كل الجمال   .. هكذا وبكل بساطة !!!
فعل ما فعله  وهو لايدرى ماذا فعل بك عندما أرتكب فعلته هذه  .. حيث تنصرف داخلك وتضرب أخماساً فى اسداساً  محاولاً
الإجابة عن سيل من الأسئلة المركبة والجدلية من نوعية ..
 ما علاقة المكان بالهوية ؟ حدثنى عن المزاج السمعى فى الجنوب وأختلافه كلياً وجزئياً عنه فى الشمال ؟
أخبرنى أيهما أقرب لهذا الشاب بحسابات الزمان والمكان والوجدان ... وادى مدنى  أم وداى النطرون ؟ .
بالضبط نفس الموقف حرفياً عند موقف النقل الداخلى فى اسوان
عندما تتداعى إلى أذنيك دقات السيرة يتبعها صوت رخيم وقوى " جنا الباباى .. يا جنا الباباى "

وتسأل نفسك حينها لماذا سمعت جنا الباباى ولم أسمع طاير يا هوى ؟؟
وتستدعى ذاكرتك اوجه مقارنة لحظية بين كمال ترباس ومحمد رشدى . وتنتهى أمام حقيقة تترسخ
أن الأوطان والإنتماءات أبداً لا ترسمها خطوط على خريطة صماء .. القصة  أعقد بكثير من خط رسمه مستعمر  .

هناك فى مصر العليا .. يتناسب طردياً الوصف مع الموصوف
 اهل الجنوب رايـــــقـــّـــيـــــن .. وعـــالــيــيـــــن 

بكل ما تحمله ولا تحمله الكلمة من دلائل و صور . المزاح والضحك والسخرية أسلوب حياة لديهم
 أهل اسوان بمراكزها وقراها وعموديتها  , على ألسنتهم كلمة واحدة من 5 حروف ..
كلمة من 5 حروف تسمعها من ادفو شمالاً حتى ابو سمبل السياحى جنوباً .. لفظة سخرية ومزاح على لسان الجميع  
وجــّـــوجـــــــــا ...
يطلقونها تعبيراً عن إعجاب أو تحية أو حتى لمداعبة فتاة ... أولـلا شىء
 يقال أنها وردت أول ما وردت على لسان فوزى مطرب الجنوب فى أحدى وقفاته الموسيقية التى يحفظها شباب الإقليم .. ومن أجلها إنشئت صفحات الفان بيدج لنفس المطرب على الفيس بوك ..  

فوزى ..  الذين يحدثونك عنه وعن وقفاته وعن كى بورده الجديد  و طرق عزفه المبتكرة .. كما يتحدث المسحورون عن ساحرهم وكما يتحدث اهل الصوفية عن شيوخهم وكما يتحدث أهل كرة القدم عن ميسى وكما يتحدث المولوعون بالتكنولوجيا عن جديد الآى فون 5 . اختلفت أو أتفقت معه .. لكنه حالة جنوبية بإمتياز لا تقل عن الجدل الذى صنعه أوكا واورتيجا وما شابهم هنا فى العاصمة
 

3 - كورنيش اسوان ..

 فى اسوان فقط يوجد هذا الإختراع .. تستطيع ركوب آلة الزمن وتنتقل بين السنون 

فبسهولة جداً وبواسطة فلوكة صغيرة وشاب يعرف مسالك ودروب نيل تربى على ضفافه .. أنت فعلياً ركبت آلة الزمن ..
حيث تتهادى بك تلك الفلوكة ذات صباح شتوى دافىء ومشمس وسط نيل اسوان وتمر بك ما بين جزر ووداخل خلجان وفجأة تجد نفسك تبحر فى خور ضيق يطل على ضفتى جزريتينً .
 على اليسار جزيرة تنتمى لعالمنا ولزمننا , يقف عليها فندق ضخم من واجتهه الخلفية . والأخرى جزيرة  تنتمى لزمن سحيق , حيث لا بشر نهائياً . فقط هى عبارة محمية طبيعية يعيش عليها حيوانات مختلفة بلإضافة للأشجار والغابات الكثيفة  . 

اسمها سالوجا . فى سالوجا تجلس فى مواجهة نيل نوبى معطياً ظهرك لأشجار السنط . وللحظة تتخيل  أن يخرج فجأة اخيك الصغير من وسط غابات  النخيل كى يخبرك ان امكم قد انتهت من إعداد طعام الغداء فتعود بصحبة أخيك عبر الحقول ولا تنسى أن تتوقف أمام  شجرة الليمون المقابلة لبيتكم كى تلتقط بعض ثمارها ..
 وفجأة تنتبه ... اننا لسنا فى عام 1850 وانما فى عام  2012 .
واننا نعيش عهد مرسى وليس عهد الخديوى اسماعيل .
وان النوبة إنتقلت لتسكن فى مكان أخر



4 - عاصمة الفن والإبداع والجمال فى النوبة ... فى أبو سمبل فى حوش بيت تنطق كل اركانه برائحة النوبة حيث الحوش الفسيح والشجرة المزروعة فى منتصفه التى ما إن تراها حتى تتشكل فى مخيلتك رائعة أحمد منيب  ( مشتاقين ) التى كتبها الراحل المقيم بفنه محى الدين شريف  
" جوة البيت هنزرع نخلة ......  تطرح خير وتعمل ضلة " 

تتحلق صُحبتنا  حول صينية المونيوم تحمل اكواب نظيفة لامعة تجاورها صينية أخرى تحمل براد شاى ذهبى اللون و عبوة لبن البودرة و سكرية من البللور وطبق يحمل انتاج البيت من الشريك , ويتطوع أحدنا بتلقيم السكر فى الأكواب ثم يشرع فى صب الشاى حثيثاً حتى يكاد يمتلىء الكوب ليقوم بعدها  بإضافة مسحوق اللبن المجفف .. لبدأ  لون الشاى فى التغير  ويصبح اقرب للون الكهرمان وفى نفس اللحظة تنساب بيننا من التابليت نغمات كى بورد ساحرة يتبعها صوت غازى القوى
 يااا سلام .. سمرا ايدي صباعك لعوردو اير ايدي صباع لعوردو صباع كون صباع كودودتوتا اسمر اللونا .. الهي نورو اسيجا
لحظتها  .. نتوجه كلنا نحو حمادة حداد  
ونكمل فى نفس واحد مع غازى .. ان هداد مغفل ايدي كايوتا واسمر اللونا
" وبعديها علي طول اقفل عين وافتح التانيه واقول يا خوانا احترموني شويه يا خوانا
الوقت الوحيد اللي في حد بيتريق عليا وابقي مستكيف بتريقته " .. حمادة حداد
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

(1) 
مقطع من أغنية أسمر اللونا احد أشهر غزليات العشق النوبيةالترجمة للعربية
سمرا قررت لأول مرة تنزل الأرض وتمسك المنجل وتقص الزرع ..
وهى بتقص جرحت صباعها الصغير
الهى يجازيك يا حداد يا مغفل ياللى خرطت المنجل اللى جرح اسمر اللونا


مصطفى الشوربجى
6 اكتوبر - القاهرة
فى 7/1/2012