لمحات من سيرة ذاتية

اتخلقت و لاقت نفسها بيشقها نيل عذب صافى جارى , تشرب و تزرع بدون مجهود  , و على ضفته من الناحيتين وادى فسيح , صفحة منبسطة كلها خير .... ارض كل يوم النيل يرمى لها ماء و  طمى يخصب ارضها , و الارض تتزرع و تطلع خير من غير مجهود و لا شقا .. الارض مستوية لا هى فيها مرتفعات و لا جبال , ولا هى منخفضة ممكن تغرق لو النيل شد حيله شوية ..

.. وادى فسيح سهل المصرى من دول  يفرد ضهره على الارض و جنبه ساقية تسقى له الارض وهو نايم يتشمس , و الارض من حواليه عمالة تطلع خير و بكده عاش المصرى حياة الدعة والخمول و التواكل و مشى حالك .... و بقى المصرى ضحية لارضه و لخيره و لنيله .. خلوّه مش شايل هم حاجة و لا عاوز يتعلم حاجة و لا يطور حاجة  .  مفيش حاجة بتستفز قدراته مفيش حاجة بتهدد وجوده عشان يفكر يواجهها , ولو فكر كان هيبدع ولما يبدع كان  هيتقدم

مش زى الهولندى مثلا اللى ربنا خلقه فى اراضى منخفضة  , الانهار عدوها الاول فأستفزت قدراته و تمسكه يالحياة و مقاومته للفناء  , كل ده خلى الهولندى يفكر و يبدع و يبنى اعظم شبكة سدود فى العالم

و مش زى اليابانى اللى فتح عينيه ولاقى نفسه فى بلد مش بلد , شوية جزر جنب بعضها مفيش زراعة و لا فى موارد طبيعية ولا فى بترول و لا معادن ولا دهب ولا أى حاجة .... مفيش غير الارز والسمك و بس .. و مش بس كده لا ده فى كمان زلازل و براكين كل ساعة , كل ده خلى اليابانى يفكر هيواجه مصيره المظلم ده ازاى ولما فكر ابدع والابداع عضو التقدم وعشان كده بقت اليابان .... اليابــــــــــــــــــــــــــان 

وانا بقى .. زى مصر

دخلت كلية سهلة جدا خلصتها فى 4 سنين بدون ما احضر اى محاضرة ولا اشترى اى كتاب  بدون مبالغة .. كلية سهلة ومش مستاهلة انى اتعب خالص ..وفعلا و بكل سهولة أتخرجت معايا بكالوريوس تجارة , و لسه هبدأ رحلة التعليم اللى بجد والكورسات والجو ده , لاقيت اللى بيقولى تشتغل فى ارقى اوتيلات مصر سميراميس انتركونتينينتال ... عرض مغرى مرتب جامد و هعيش حياة محدش يحلم بيها حفلات  و سهر و بتشوف كل يوم كريمة المجتمع و أفراح المشاهير ... شغلتك عبارة أنك تحضر حفلات وافراح من الدرجة الاولى , حد يكره الجو ده ويفكر يدخل كورسات عشان يطور نفسه عشان يدور على شغل ؟؟  مستحيل طبعا .... وكلها سنتين و دخلت فى مرحلة الملل  و قررت اسيب الاوتيل ... وعدّت مرحلة الفندق .. قلت بس الفرصة جت تانى عشان أبدأ صح , ولسه يا ولداه بفكر فى أول كورس هأخده لاقيت المفاجأة التانية

فيزا ببلاش أسافر اشتغل فى الكويت وحق التذكرة معايا والدنيا حلوة .... سافرت بس لاقيت ان اكتر مناطق العالم قبحا هى دول الخليج وبالذات السعودية والكويت بدون التعرض لأى مقدسات دينية عشان فى ناس لما بتصدق ... المهم قررت فى شهرين بس ارجع و رجعت عشان ابدا أعمل اللى ما عملتوش , وأعلم نفسى بنفسى تعليم صح وكورسات لغة عشان أطور نفسى والجو ده بس هيهات , لا تتوقف الظروف عن خدمتى ... عقد عمل فى مصلحة الضرائب على المبيعات .. مأمور ضرائب , ومرتب مغرى !!! تانى .... هل ممكن أرفض أو أتحجج بالكورسات ولا تطوير ولا اكتساب مهارات جديدة وكل الكلام الحلو ده ؟؟ لا طبعا مش ممكن مستحيل .. وطبعا اشتغلت و شغلى سهل و بخلص شغلى 2.30 الضهر و برجع بيتنا الحمد لله ميت فل وتمنتاشر ......

مصطفى الشوربجــــــى
القاهرة فى2010/10/21